மதுரை மேம்பால விபத்து - ஒப்பந்ததாரரின் அலட்சியமே காரணம் என அமைச்சர் குற்றச்சாட்டு

மதுரையில் நிகழ்ந்த மேம்பால கட்டுமானப் பணி விபத்துக்கு ஒப்பந்ததாரரின் அலட்சியமே காரணம் என தமிழ்நாடு பொதுப்பணித்துறை அமைச்சர் எ.வ.வேலு தெரிவித்துள்ளார்.

மதுரை: மதுரை நாராயணபுரம் பகுதியில் ஏற்பட்ட மேம்பால விபத்து பகுதியினை நிதியமைச்சர் பழனிவேல் தியாகராஜன், பொதுப்பணித்துறை அமைச்சர் எ.வ.வேலு, மாவட்ட ஆட்சியர் அனிஷ்சேகர், மாநகராட்சி ஆணையாளர் கார்த்திகேயன் ஆகியோர் நேரில் ஆய்வு மேற்கொண்டனர்.

இதனையடுத்து செய்தியாளர்களைச் சந்தித்த பொதுப்பணித்துறை அமைச்சர் எ.வ. வேலு கூறியதாவது:

'சாகர்மாலா திட்டத்தின்கீழ் தேசிய நெடுஞ்சாலை ஆணையத்தின் சார்பில் செயல்படுத்தப்படும் மத்திய அரசின் திட்டம், 3 ஆண்டுகாலமாக நடைபெறுகிறது.

அப்பணிகள் அடுத்தாண்டு ஏப்ரல் மாதம் முடிவடைகிறது. மேம்பால விபத்து தவிர்க்கப்பட வேண்டியது. ஒப்பந்ததாரரின் மெத்தனம் காரணமாகவே இந்த விபத்து நடந்துள்ளது.

விபத்து நடந்த பகுதியை ஆய்வு செய்த அமைச்சர் எ.வ.வேலு

ஒப்பந்ததாரரின் அலட்சியம்

பாலம் இணைப்புப் பணியின்போது கிர்டரை (Girder) இணைக்கும்போது ஹைட்ராலிக் இயந்திரம் பழுது காரணமாக விபத்து ஏற்பட்டுள்ளது. 160 டன் கிர்டரை தூக்கி நிறுத்த 200 டன் எடையுள்ள ஹைட்ராலிக் இயந்திரம் ஏன் பயன்படுத்தப்பட்டது என ஆய்வு செய்ய உத்தரவிட்டுள்ளோம்.

இது பாதுகாப்பற்ற நிலையில் செயல்படுத்தியதன் காரணமாக நடைபெற்றுள்ளது. முழுக்க முழுக்க ஒப்பந்ததாரரின் அலட்சியமே விபத்துக்குக் காரணம்.

பணி நடைபெற்ற இடத்தில் மேற்பார்வை பொறியாளர் இருப்பதற்குப் பதிலாக தொழிலாளர்கள் மட்டுமே இருந்துள்ளனர். சரியான பாதுகாப்பு அம்சங்கள் இல்லாத நிலையில் பணிகள் நடைபெற்றுள்ளன. ஹைட்ராலிக் ஜாக் தன்மை குறித்து விசாரணை நடத்தி ஆய்வு செய்ய உத்தரவிட்டுள்ளோம்.

என்ஐடி தொழில் நுட்ப நிபுணரான திருச்சி பாஸ்கர் தலைமையிலான குழு தேசிய நெடுஞ்சாலை ஆணையத்திற்கு விசாரணை அறிக்கைத் தாக்கல் செய்யவுள்ளது.

விபத்தில் உயிரிழந்தவருக்கு நிதியுதவி அளிப்பது குறித்து முதலமைச்சர் அறிவிப்பார். அவர்களுடைய கண்ணோட்டத்தில் விசாரணை அலுவலர்கள் விளக்கமளிக்கின்றனர். விசாரணைக்குழுவானது விபத்தை தொடர்ந்து பாலத்தின் பணிகளை முழுமையாக ஆய்வுசெய்யும்.

அலுவலர்களுக்கு நோட்டீஸ்

ஒப்பந்ததாரர் எக்மா ஸ்டெர்லைட் போன்ற பாதுகாப்புப் பணி தொடர்பான ஒப்பந்த நிறுவன பொறியாளர் சம்பவ இடத்தில் இல்லை. அது தொடர்பாக விசாரணை நடத்தப்படும்.

திமுக அரசு அமைந்த பின் சாலை, பாலம் அமைக்கும் பணிகளை ஆய்வு செய்ய அரசு சார்பில் தரப் பரிசோதனை குழு அமைத்து ஆய்வு மேற்கொண்டுவருகிறது.

தமிழ்நாட்டில் உள்ள பல்வேறு பகுதிகளில் நடைபெற்ற பணிகளில் முறைகேடு நடந்துள்ளதாக, அலுவலர்களுக்கு நோட்டீஸ் அனுப்பியதோடு, ஒப்பந்தங்களையும் ரத்து செய்து நடவடிக்கைகள் எடுத்துள்ளோம். திட்டப் பணிகளின் போது பொதுமக்களின் பாதுகாப்பிற்கு முன்னுரிமை அளித்துப் பணிகளைத் தொடர்வோம்'

இவ்வாறு அவர் தெரிவித்தார்.

இதையும் படிங்க: மதுரை பாலம் கட்டுமான விபத்து: 3 பேர் மீது வழக்குப்பதிவு!