மதுரை மாவட்டம் உசிலம்பட்டி அருகே குறிஞ்சிநகரில் 100க்கும் மேற்பட்ட மலைவாழ் மக்கள் வசித்துவருகின்றனர். இவர்கள் அருகில் உள்ள மலைப்பகுதியில் ஆடுகளை மேய்ப்பது, மூலிகை பொருட்களை சேகரிப்பதை வழக்கமாக கொண்டுள்ளனர்.
இந்நிலையில் நேற்று முன்தினம் இக்கிராமத்தைச் சேர்ந்த செல்வம் உள்ளிட்ட ஆறு பேர் கொண்ட மலைப்பகுதியில் ஆடு மேய்க்க சென்ற போது பலத்த மழை பொழிந்ததாகவும், அப்பொழுது இடி தாக்கியதில் 37 ஆடுகள் உயிரிழந்ததாகவும் கூறப்படுகிறது. தங்களின் வாழ்வாதாரமாக இருந்த ஆடுகள் இறந்ததால் மன உளைச்சலில் இருந்த செல்வம் ஆடுகளுக்கு நிவாரணம் வழங்க கோரி கிராமத்தின் அருகே உள்ள உயர்மின் கோபுரத்தில் ஏறி தற்கொலை போராட்டத்தில் ஈடுபட்டார்.
இதுகுறித்து தகவல் அறிந்து சம்பவ இடத்திற்கு வந்த உசிலம்பட்டி காவல்துறை மற்றும் தீயணைப்புத்துறை அதிகாரிகள் சுமார் 4 மணி நேரமாக பேச்சுவார்த்தை நடத்தி உரிய நிவாரணம் கிடைக்கும் என உறுதியளித்த பின் உயர்மின் கோபுரத்திலிருந்து செல்வம் கீழே இறங்கினார்.
