மதுரை மீனாட்சி அம்மன் கோயில் சித்திரைத் திருவிழா கடந்த 15ஆம் தேதி கொடியேற்றத்துடன் தொடங்கியது. 22ஆம் தேதி பட்டாபிஷேகம், 23ஆம் தேதி திக்விஜயம் ஆகிய நிகழ்வுகள் நடைபெற்றன.
இந்நிலையில் 10ஆம் நாளான இன்று (ஏப்.24) விழாவின் முக்கிய நிகழ்வான மீனாட்சி அம்மன் - சுந்தரேஸ்வரர் திருக்கல்யாண விழா காலை 8.45 மணிக்கு நடைபெற்றது. கரோனோ பரவல் காரணமாக பக்தர்கள் இன்றி திருக்கல்யாணம் நடைபெற்றது.
வரலாற்றில் இரண்டாவது முறையாக பக்தர்களின்றி திருக்கல்யாண நிகழ்வு நடைபெற்றது. கடந்த ஆண்டும் கரோனோ பரவல் காரணமாக பக்தர்களின்றி நடைபெற்றது.
பக்தர்களுக்கு அனுமதி இல்லாத நிலையில் கோயிலுக்கு வெளிப்புறம் புது மண்டபம் முன்பாக நூற்றுக்கணக்கான பெண்கள் புதிய தாலி கயிற்றில் திருமங்கல்யத்தை மாற்றிக்கொண்டு சாமி தரிசனம்செய்தனர்.
திருமணத்தில் பங்கேற்பதற்காக திருப்பரங்குன்றம் சுப்பிரமணிய சுவாமியும், பவளக்கனிவாய் பெருமாளும் மீனாட்சி அம்மன் கோயிலில் எழுந்தருளுவது வழக்கமாக இருந்துவரும் நிலையில் பக்தர்களின்றி எளிமையான முறையில் நடைபெறுவதால் சுப்பிரமணிய சுவாமியும், பவளக்கனிவாய் பெருமாளும் பங்கேற்கவில்லை.
மதுரை மீனாட்சியம்மன் திருக்கல்யாணம்
மேலும் காலை 9.30 மணியிலிருந்து பிற்பகல் 2.30 மணி வழக்கமான தரிசனத்திற்கு மட்டும் பக்தர்கள் கோயிலுக்குள் அனுமதிக்கப்பட்டனர். இதனால் கோயிலுக்கு அருகிலேயே பக்தர்கள் தங்களது திருமாங்கல்ய கயிறு மீனாட்சி அம்மனை நினைத்து மாற்றிக்கொண்டனர்.
இதையும் படிங்க: இலங்கைக்கு கஞ்சா கடத்த முயன்றவர்கள் கைது
