கேரளாவிலிருந்து தமிழ்நாட்டின் எல்லைப் பகுதியில் கழிவுகள் கொட்டப்படுவதைத் தடுக்கக்கோரி தென்காசி மாவட்டம் பரவன்பற்றுகளம் கிராமத்தைச் சேர்ந்த மாடசாமி என்பவர் உயர் நீதிமன்ற மதுரைக்கிளையில் மனு தாக்கல் செய்திருந்தார். அம்மனுவில், "தென்காசியில் கேரளா-தமிழ்நாடு எல்லை சோதனைச்சாவடியானது புளியரை பேருந்து நிலையத்திலிருந்து 1 கிலோ மீட்டர் தூரத்தில் அமைந்துள்ளது. புளியரை கிராமத்திற்கு அடுத்த தமிழ்நாடு எல்லைக்கு உட்பட்ட பகுதியில் பரவன்பற்றுகளம், ஸ்ரீ முலப்பேரி நீர் தேக்கம், எஸ் வளைவு, கோட்டைவாசல் என நான்கு கிராமங்கள் உள்ளன. இங்கு 400 குடும்பங்கள் வசித்துவருகின்றன.
புளியரை பகுதியில் தமிழ்நாடு எல்லை சோதனைச்சாவடி அமைந்துள்ளதால் எங்கள் கிராமத்திற்கு கட்டட வேலைகளுக்கு கொண்டுசெல்லும் மணல், ஜல்லி, செங்கல், விவசாயப் பொருள்களான நெல், வாழை, வீட்டு உபயோகப் பொருள்கள் அரிசி, பருப்பு, சிறுதானியம் கொண்டுசெல்லும் வாகனங்கள் சரியான ஆவணங்கள் இருந்தும் உள்ளே நுழைவதற்கு மறுப்பு தெரிவிக்கின்றனர்.
மேலும், கேரளா எல்லைக்குள் நுழைந்த 500 மீட்டரில் சோதனைச் சாவடி அமைந்துள்ளது. ஆனால், தமிழ்நாட்டின் உள்ளே 6 கிலோமீட்டர் தொலைவிற்கு பின்புதான் சோதனைச்சாவடி அமைந்துள்ளது. கேரளப் பகுதியிலிருந்து தமிழ்நாடு எல்லைக்கு உட்பட்ட பகுதிகளில் கோழி இறைச்சிக் கழிவுகள், பனைமர நுங்கு கழிவுகள், அழுகிய முட்டைகள், அழுகிய வாழை இலைகள், அழுகிய காய்கறிகள், மருத்துவக் கழிவுகள் என வீணான அனைத்துப் பொருள்களையும் கிராமப்புறங்களில் உள்ள சாலைகளில் கொட்டிச் செல்கின்றனர்.
இதனால் எங்கள் கிராமத்தில் பொதுச் சுகாதாரம் சீர்கெட்டு, பெருந்தொற்று நோய்கள் பரவும் அபாய நிலை ஏற்பட்டுள்ளது. இதனால் தமிழ்நாடு சோதனைச்சாவடியைக் கோட்டைவாசல் பகுதிக்கு மாற்றுவதற்காக மாவட்ட ஆட்சியர், அலுவலர்களுக்கு மனு அளித்தும் இதுவரை எந்த ஒரு நடவடிக்கையும் எடுக்கப்படவில்லை. எனவே, இந்த நிலையை மாற்றவும் எல்லைப் பகுதிகளைப் பாதுக்காக்கவும் புளியரைப் பகுதியில் செயல்பட்டுவரும் தமிழ்நாடு எல்லை சோதனைச்சாவடியைக் கோட்டைவாசல் பகுதிக்கு மாற்றியமைக்க வேண்டும்" என்று கோரிக்கை விடுக்கப்பட்டுள்ளது.
இந்த மனு இன்று (ஜூன் 29) நீதிபதிகள் சத்தியநாராயணன், ராஜமாணிக்கம் ஆகியோர் அடங்கிய அமர்வுக்கு முன்பு விசாரணைக்கு வந்தது. மனுவை விசாரித்த நீதிபதிகள், ”எல்லையிலிருந்து 6 கிலோமீட்டர் உள்ளே சோதனைச்சாவடி வைப்பதற்கு அனுமதி உள்ளது. சுற்றுச்சூழலுக்கு தீங்கு விளைவிக்கும் வகையில் மருத்துவக் கழிவுகள், இதர கழிவுகள் கேரளாவிலிருந்து கொண்டுவரப்பட்டு தேனி, திருநெல்வேலி, கன்னியாகுமரி ஆகிய பகுதிகளில் கொட்டப்படுகிறது என தொடர்ந்து புகார்வருவதால், ஏன் தென்காசி கோட்டைவாசல் பகுதியில் உடனடியாக தற்காலிக சோதனைச்சாவடி அமைக்கக் கூடாது” என்று கேள்வியெழுப்பினர்.
இதுதொடர்பாக தென்காசி மாவட்ட ஆட்சியர், சம்பந்தப்பட்ட அலுவலர்கள் அறிக்கை தாக்கல்செய்ய உத்தரவிட்டு, வழக்கை இரண்டு வாரத்திற்கு ஒத்திவைத்தனர்.
