வாறாரு... வாறாரு... அழகர் வாறாரு... ஆரவாரத்துடன் வரவேற்ற பக்தர்கள்

வைகை ஆற்றில் எழுந்தருள திருமாலிருஞ்சோலை கள்ளழகர் மதுரை வந்தடைந்தார். அவரை பக்தர்கள் மூன்றுமாவடி அருகே எதிர்கொண்டு வரவேற்றனர்.

மதுரை சித்திரைத் திருவிழாவின் முக்கிய நிகழ்வான கள்ளழகர் வைகை ஆற்றில் இறங்கும் விழா நாளை (ஏப்ரல்.16) காலை 5.50 மணி முதல் 6.20 மணிக்குள் நடைபெற உள்ளது. நடக்கவிருக்கிறது. அப்போது கள்ளழகர் மண்டூக முனிவருக்கு சாபவிமோசனம் கொடுத்து, ஆண்டாள் சூடிக்கொடுத்த திருமாலையை ஏற்றுக்கொண்டு வைகை ஆற்றில் இறங்குவார்.

இதற்காக அழகர் கோயிலிலிருந்து, கள்ளழகர் நேற்று மாலை (ஏப்.14) அதிர்வேட்டு முழங்க தங்கப்பல்லக்கில் பரிவாரங்களுடன் மதுரை நோக்கி புறப்பட்டார். அப்போது அவருக்கு கண்டாங்கி பட்டலங்காரம், கையில் சங்கு, சக்கரம், நேரிக்கம்பு, வளைதடி கொண்டு அலங்காரம் செய்யப்பட்டது.

முன்னதாக பதினெட்டாம்படி கருப்பண்ணசாமி கோயில் முன்பு கள்ளழகருக்கு சிறப்பு பூஜை, தீபாராதனை நடந்தப்பட்டன. வழிநெடுகிலும் உள்ள பொய்கைக்கரைப்பட்டி, கள்ளந்திரி, அப்பன்திருப்பதி, சுந்தரராஜன்பட்டி, கடச்சனேந்தல், மூன்று மாவடி வரை உள்ள மண்டகப்படிகளில் பெருமாள் எழுந்தருளி பக்தர்களுக்குக் காட்சி தந்தார்.

இன்று காலை 7 மணியளவில் மூன்று மாவடியில் கள்ளழகரை பக்தர்கள் எதிர்கொண்டு அழைக்கும் எதிர் சேவை நிகழ்ச்சி நடைபெற்றது. இதில் திரளான பக்தர்கள் கலந்துகொண்டு அழகரை வரவேற்றனர்.

இந்த விழாவையொட்டி வைகை அணையில் இருந்து தண்ணீர் திறக்கப்பட்டுள்ளது. அந்த வகையில் இன்று வைகை ஆற்றில் பெருக்கெடுத்து ஓடுகிறது. முன்னெச்சரிக்கை நடவடிக்கைகளில் மாவட்ட நிர்வாகமும், மாநகராட்சியும் பாதுகாப்பு ஈடுபட்டுவருகிறது.

இதையும் படிங்க: 'என்னது.. அழகர் மதுரைக்குள்ள வந்தாரா..?' - அழகரின் ஆயிரமாண்டு வரலாறும் வியப்பில் ஆழ்த்தும் சிறப்பு தொகுப்பும்