மதுரை தல்லாகுளத்தைச் சேர்ந்த மகேந்திரன் என்பவர், உயர்நீதிமன்ற மதுரைக் கிளையில் மனு ஒன்றை தாக்கல் செய்திருந்தார். அதில், "அமைச்சர் ராஜேந்திர பாலாஜி, பதவியை தவறாக பயன்படுத்தி 2011 முதல் 2013 வரை வருமானத்துக்கு அதிகமாக சொத்து சேர்த்தது தொடர்பாக அவர் மீது வழக்குப் பதிவு செய்ய லஞ்ச ஒழிப்பு காவல்துறையினருக்கு உத்தரவிட வேண்டும்" என கூறியிருந்தார்.
இந்த மனு ஏற்கனவே விசாரணைக்கு வந்தபோது, புகாரில் முகாந்திரம் இல்லை என்பதால் விசாரணை கைவிடப்பட்டது என லஞ்ச ஒழிப்புத்துறை சார்பில் தெரிவிக்கப்பட்டது. இதையேற்க மறுத்த நீதிபதிகள், அமைச்சர் ராஜேந்திர பாலாஜி 1996ல் இருந்து தற்போது வரை அவருடைய வருமானம் மற்றும் சொத்துகள் தொடர்பாக விசாரிக்க உத்தரவிட்டிருந்தனர்.
இந்நிலையில், இந்த வழக்கு சத்தியநாராயணன், புகழேந்தி அமர்வில் புதன்கிழமையன்று விசாரணைக்கு வந்தது. அப்போது லஞ்ச ஒழிப்பு இயக்குநர் சார்பிலும், தமிழ்நாடு பொதுத்துறை செயலர் சார்பிலும் சீலிட்ட கவரில் அறிக்கை தாக்கல் செய்யப்பட்டது. அதில், விசாரணையின் அடிப்படையில் அமைச்சர் ராஜேந்திர பாலாஜி மீதான சொத்து குவிப்பு வழக்கில், நடவடிக்கை கைவிடப்பட்டது என குறிப்பிடப்பட்டிருந்தது.
இதைத் தொடரந்து சொத்து குவிப்பு வழக்கு விசாரணையின் அனைத்து ஆவணங்களையும் நீதிமன்றத்தில் தாக்கல் செய்ய தமிழ்நாடு பொதுத்துறை செயலருக்கு உத்தரவிட்டு வழக்கு விசாரணையை ஆகஸ்ட் 26ஆம் தேதிக்கு ஒத்திவைத்தனர்.
