ஈரோடு: குடியுரிமை திருத்தச் சட்டத்திற்கு எதிராக நாடு முழுவதும் போராட்டம் நடைபெற்று வருகிறது. தமிழ்நாட்டிலும் இஸ்லாமிய அமைப்பினர் பல்வேறு போராட்டங்களை நடத்திவருகின்றனர். இந்நிலையில் சென்னை வண்ணாரப்பேட்டையில் நடைபெற்ற குடியுரிமை திருத்தச் சட்டத்திற்கு எதிரான போராட்டத்தில் இஸ்லாமியர்கள் மீது காவல்துறையினர் தடியடி நடத்தினர். இந்த தாக்குதல் சம்பவத்தை நடத்திய காவல் துறையினை கண்டித்து ஈரோட்டில் போராட்டம் நடைபெற்றது. பேருந்து நிலையம் முன்பாக நடைபெற்ற போராட்டத்தில் எஸ்டிபிஐ, தமிழக முஸ்லிம் முன்னேற்ற கழகம் உள்ளிட்ட பல்வேறு அமைப்புகளைச் சேர்ந்த 300க்கும் மேற்பட்டோர் கலந்து கொண்டனர்.
மதுரை
மதுரையில் வில்லாபுரம் பகுதியில் விமான நிலையத்திற்குச் செல்லும் சாலையில் பெண்கள் உள்பட 300க்கும் மேற்பட்டோர் தீடீரென சாலை மறியல் போராட்டத்தில் ஈடுபட்டனர்.
இதனால் அந்தப் பகுதியில் கடும் போக்குவரத்து நெரிசல் ஏற்பட்ட நிலையில் போராட்டக்காரர்களை கட்டுப்படுத்த 100க்கும் மேற்பட்ட காவல் துறையினர் குவிக்கப்பட்டனர். சாலை மறியல் போராட்டத்தில் ஈடுபட்டவர்கள் தொடர்ந்து குடியுரிமை திருத்தச் சட்டத்திற்கு எதிரான கோஷங்களை எழுப்பினர். அமைதி வழியில் சென்னையில் நடத்திய போராட்டத்தில் தடியடி நடத்தப்பட்டததை கண்டித்து இரவு நேரத்திலும் பெண்கள் கை குழந்தைகளோடு சாலையில் அமர்ந்து போராட்டத்தில் ஈடுபட்டனர்.
காவல் துறையினர் போராட்டக்காரர்களுடன் பேச்சுவார்த்தை நடத்தியதைத் தொடர்ந்து போராட்டத்தை கைவிட்டு கலைந்து சென்றனர்.
திண்டுக்கல்
அதேபோல் திண்டுக்கல் மாவட்டம் கொடைக்கானல் பகுதியில் இஸ்லாமியர்கள் சாலை மறியல் போராட்டத்தில் ஈடுபட்டனர். மேலும், திண்டுக்கல் - மதுரை சாலையின் பிரதான சாலை வழியில் உள்ள பேகம்பூரில் 500க்கும் மேற்பட்ட இஸ்லாமியர்கள் சாலை மறியலில் ஈடுபட்டனர். குறிப்பாக கொடைக்கானல் மூஞ்சிக்கல் பகுதி பிரதான சாலையில் நடைபெற்ற போராட்டத்தால் போக்குவரத்து பாதிக்கப்பட்டது. இதையடுத்து போராட்டத்தினை கைவிடும்படி மாவட்டக் காவல் கண்காணிப்பாளர் சக்திவேல் பேச்சுவார்த்தை நடத்திய பின்பு போராட்டக்காரர்கள் கலைந்து சென்றனர்.
இதையும் படிங்க: CAA-க்கு எதிராக ஒற்றைக் கோரிக்கை ஆர்ப்பாட்டம்
