சாலையேர மரக்கன்று பரமாரிப்பு வழக்கு; நெடுஞ்சாலைத்துறை செயலர்கள் பதிலளிக்க நீதிமன்றம் உத்தரவு

மதுரை: தேசிய மற்றும் மாநில நெடுஞ்சாலையோரங்களில் மரக்கன்று நட்டு, பராமரிக்க கோரிய வழக்கில் மத்திய, மாநில நெடுஞ்சாலைத்துறை செயலர்கள் பதில் அளிக்க உயர் நீதிமன்ற மதுரைக்கிளை உத்தரவிட்டுள்ளது.

மதுரையைச் சேர்ந்த வழக்கறிஞர் எம்.திருநாவுக்கரசு, உயர் நீதிமன்ற மதுரைக்கிளையில் மனு ஒன்றை தாக்கல் செய்திருந்தார். அதில்," மன்னர் ஆட்சி காலத்திலும், அதற்கு பிறகும் சாலையோரங்களில் இரு பக்கங்களிலும் மரங்கள் நட்டு பராமரிக்கப்படுவது வழக்கமாக இருந்து வருகிறது. இந்த மரங்கள் நீண்ட தூரம் பயணம் செய்வோர் சிறிது நேரம் ஓய்வு எடுக்கவும், வெயில் மற்றும் மழைக்கு ஒதுங்கவும் பயனளித்து வந்தது.

பயணிகள் ஓய்வு எடுப்பதற்காக ஒன்று அல்லது 2 கிலோ மீட்டர் தூரத்திற்கு ஒரு கல் மண்டபம் கட்டப்பட்டது. கல் மண்டபம் அருகே குளம் வெட்டி அதில் மழை நீரை தேக்கி பயணிகள், சாலையை பயன்படுத்துவோரின் தண்ணீர் தேவை பூர்த்தி செய்யப்பட்டது. சாலையோர மரங்கள் வெயிலில் இருந்து மக்களை காப்பாற்றுவது மட்டும் இல்லாமல் இயற்கை பாதுகாப்புக்கும் பயன்பட்டது. சாலையோரங்களில் வேம்பு, புளிய மரங்கள் அதிகளவில் நடப்பட்டன. இந்த மரங்களை குத்தகைக்கு விடுவதால் உள்ளாட்சி அமைப்புகளுக்கும் வருவாய் கிடைத்து வந்தது.

வாகனப்பெருக்கம் காரணமாக சாலைகள் 4 மற்றும் 6 வழிச்சாலையாக மாற்றப்படுவதால் சாலையோர மரங்கள் வெட்டி அகற்றப்பட்டன. நாட்டின் வளர்ச்சிக்காக சாலை இணைப்பு மற்றும் விரிவாக்கப்பணி மேற்கொள்ள வேண்டியது அவசியமாக இருந்தாலும், வளர்ச்சிப்பணி என்ற பெயரில் மரங்களை அகற்றுவதை ஏற்க முடியாது.

சாலை விரிவாக்கப்பணிக்காக பலநூறு ஆண்டு பழமையான மரங்கள் வெட்டி சாய்க்கப்படுகின்றன. சாலையோர மரங்கள் அகற்றப்படுவதால் பருவகாலம் மற்றும் சுற்றுச்சூழலில் பெரியளவில் மாறுதல் ஏற்படுகிறது.

தமிழ்நாட்டில் நடைபெற்று வரும் சாலை விரிவாக்கப்பணிக்காக ஆயிரக்கணக்கான மரங்கள் வெட்டப்பட்டுள்ளன. நத்தம் வழியாக மதுரை முதல் திண்டுக்கல் வரை நான்கு வழிச்சாலை அமைக்கும் பணிக்காக சாலையின் இரு பக்கங்களிலும் இருந்த நூற்றுக்கணக்கான மரங்கள் வெட்டப்பட்டன. தற்போது இந்த வழித்தடம் பாலைவனம் போல் காட்சியளிக்கிறது.

சாலை விரிவாக்கத்தின் போது மரங்களை பாதுகாக்க மத்திய போக்குவரத்துறை பசுமை வழிச்சாலை (மரங்கள் நடுவது, அழகுபடுத்தல், பராமரித்தல்) கொள்கையை 2015-ல் வகுத்தது. இந்த கொள்கையில் சாலையோரங்களில் மரங்கள் நடவும், அவற்றை பராமரிக்கவும் முடிவு செய்யப்பட்டுள்ளது.

சென்னை முதல் கன்னியாகுமரி வரை 50 ஆயிரம் மரங்கள் நடப்படும்என நெடுஞ்சாலை ஆணையம் அறிவிப்பு வெளியிட்டது. அதன்படி மரங்கள் நடப்படவில்லை. சென்னை -திருச்சி, மதுரை -கன்னியாகுமரி சாலை விரிவாக்கப்பணிக்காக 31667 மரங்கள் வெட்டப்பட்டுள்ளன.

சாலை அமைப்பதற்காக மரங்கள் வெட்டும் போது ஒரு மரத்துக்கு பதில் பத்து மரங்களை நட வேண்டும் என உயர் நீதிமன்றம் உத்தரவிட்டது. இருப்பினும் மரங்கள் நடப்படவில்லை. சில இடங்களில் பெயரளவில் மரங்களை நட்டுள்ளது. பெரும்பாலான இடங்களில் மரங்கள் நடப்படவில்லை. இதனால் தமிழகத்தில் உள்ள தேசிய மற்றும் மாநில நெடுஞ்சாலையோரங்களில் மரங்கள் நட்டு, பராமரிக்க. உத்தரவிட வேண்டும்" என அதில் கூறியிருந்தார்

இந்த மனு நீதிபதிகள் முன் விசாரணைக்கு வந்தது. அப்போது தேசிய நெடுஞ்சாலைத்துறை ஆணையம் சார்பில் பதில் மனு தாக்கல் செய்யப்பட்டது. அதில் மதுரை - கன்னியாகுமரி (NH 7) நெடுஞ்சாலையின் இருபுறங்களிலும் மரங்களை நட்டு பராமரிக்க சுமார் ரூ.8 கோடி மதிப்பில் திட்டம் தயார் செய்யப்பட்டு, 5 ஆண்டுகளில் இந்த பணிகள் முடிக்கப்படும்.

தமிழ்நாடு முழுவதும் உள்ள தேசிய, மாநில நெடுஞ்சாலைகளின் இருபுறங்களிலும் மரக்கன்றுகளை நட்டு பராமரிக்கபடும் என்று அதில் தெரிவித்திருந்தது.

இதனையடுத்து நீதிபதிகள், மத்திய, மாநில நெடுஞ்சாலைத்துறை செயலர்கள் இதுகுறித்து பதிலளிக்க வேண்டும் என உத்தரவிட்டு விசாரணையை ஜனவரி 6 ஆம் தேதிக்கு ஒத்திவைத்தனர்.