மதுரை மாவட்டம் ஊமச்சிகுளம் கூலபாண்டி கிராமத்தைச் சேர்ந்த மணிகண்டன் என்பவர், காய்கறி வியாபாரம் செய்து வந்தார். நேற்று (அக்.,19) திருப்பாலை பகுதியில் உள்ள அரசு மதுபானக் கடை அருகே தனது நண்பர்களுடன் சேர்ந்து மது அருந்தி கொண்டிருந்தார். இந்நிலையில் திடீரென அவர்களுக்கு இடையே தகராறு ஏற்பட்டது.
இந்தத் தகராறில் மதுபோதையில் இருந்த மணிகண்டனை உடன் இருந்த நண்பர்கள் தாங்கள் மறைத்து வைத்திருந்த பெட்ரோலை ஊற்றி எரித்துள்ளனர். தீயில் கருகிய நிலையில் வலி பொறுக்காமல் கதறிய மணிகண்டனை அருகில் உள்ளவர்கள் மீட்டு ஆம்புலன்ஸ் உதவியுடன் மதுரை அரசு ராஜாஜி மருத்துவமனைக்கு சிகிச்சைக்காக அனுப்பிவைத்தனர்.
கிட்டத்தட்ட 90 விழுக்காடு தீக்காயத்துடன் தீவிர சிகிச்சை பிரிவில் மணிகண்டன் அனுமதிக்கப்பட்டிருந்தார். இன்று (அக்.,20) அதிகாலையில் மணிகண்டன் சிகிச்சை பலனின்றி உயிரிழந்தார்.
இந்தச் சம்பவம் தொடர்பாக தல்லாகுளம் காவல் துறையினர் வழக்குப் பதிவு செய்து விசாரணை நடத்திவருகின்றனர். சில நாள்களுக்கு முன்பாக மணிகண்டனுக்கும் அதே பகுதியைச் சேர்ந்த அழகர் என்பவருக்கும் இடையே தகராறு ஏற்பட்டுள்ளது. இதற்கும், மணிகண்டனின் உயிரிழப்பிற்கும் ஏதேனும் தொடர்புள்ளதா என்ற கோணத்தில் அழகர் உள்பட மூவரை காவல் துறையினர் தேடி வருகின்றனர்.
பொது இடத்தில் மதுபோதையில் நடைபெற்ற தகராறில் இளைஞரை பெட்ரோல் ஊற்றி எரித்து கொலை செய்த சம்பவம் பரபரப்பை ஏற்படுத்தியுள்ளது.
இதையும் படிங்க:பட்டப்பகலில் இளைஞர் வெட்டிக்கொலை - அடையாளம் தெரியாத கும்பல் வெறிச்செயல்
