திண்டுக்கல் மாவட்டம் ரெங்கநாதபுரம் பகுதியைச் சேர்ந்த பிரபல ரவுடி கார்த்திக் ஆட்டோ ஓட்டுநர். இவர் மார்ச் 19ஆம் தேதி முதல் காணவில்லை என்று திண்டுக்கல் தாலுகா காவல் நிலையத்தில் அவரது மனைவி பிரேமா புகார் அளித்திருந்தார். இந்நிலையில், நேற்று (மார்ச் 21) அவரது உடல் மதுரை மாவட்டம் வாடிப்பட்டி அருகே விராலிப்பட்டி அருகே மதுரை திண்டுக்கல் தேசிய நெடுஞ்சாலை பகுதியில் அழுகிய நிலையில் மீட்கப்பட்டது.
இதையடுத்து, உடலை கைப்பற்றிய வாடிப்பட்டி காவல் துறையினர் உடற்கூறாய்வுக்காக வாடிப்பட்டி அரசு மருத்துவமனைக்கு கொண்டு சென்றனர். பின்னர் வழக்குப்பதிவு செய்த காவல் துறையினர் விசாரணை மேற்கொண்டுவருகின்றனர்.
இது குறித்து வாடிப்பட்டி காவல் துறையினர் நடத்திய விசாரணையில், 2015ஆம் ஆண்டில் திண்டுக்கல் என்.ஜி.ஓ. காலனிப் பகுதியைச் சேர்ந்த கொட்டகை கிருஷ்ணன் என்பவரை வெட்டிக்கொலை செய்த வழக்கு கார்த்திக் மேல் நிலுவையில் உள்ளது என்பது தெரியவந்தது.
இந்த வழக்கு சம்பந்தமாக மார்ச் 19ஆம் தேதி நீதிமன்றத்தில் வாய்தாவிற்கு ஆஜராகி விட்டு வீடு திரும்பிய கார்த்திக்கை, அவரது நண்பன் மனோஜ் என்பவர் ஐந்து கூட்டாளிகளுடன் சேர்ந்து அழைத்துச் சென்று அடித்துக்கொலை செய்துவிட்டு, உடலை வாடிப்பட்டி அருகே வீசி விட்டு சென்றுள்ளார். மேலும், இந்த ஆறு குற்றவாளிகளும் பெரியகுளம் நீதிமன்றத்தில் சரணடைந்துள்ளதாக முதற்கட்ட விசாரணையில் தெரியவந்துள்ளது.
