தூத்துக்குடி மாவட்டத்தைச் சேர்ந்த பெண் ஒருவர் உயர் நீதிமன்ற மதுரை கிளையில் தாக்கல் செய்த மனுவில், "மன வளர்ச்சி குன்றிய 17 வயது மகளுடன் வசித்துவருகிறேன். நான் கூலி வேலைக்காகச் சென்ற நேரம் பார்த்து பக்கத்து வீட்டிலிருந்த 55 வயதுடைய ஒருவர் எனது மகளைப் பாலியல் வன்கொடுமை செய்ததில் மகள் கர்ப்பமடைந்துள்ளார். ஆகவே எனது மகளின் கருவைக் கலைக்க அனுமதி வழங்கியும், உரிய இழப்பீட்டை வழங்கவும் உத்தரவிட வேண்டும்" எனக் கோரியிருந்தார்.
இந்த வழக்கு நீதிபதி சி.வி. கார்த்திகேயன் முன்பாக இன்று விசாரணைக்கு வந்தது. அப்போது அரசுத் தரப்பில் தூத்துக்குடி மாவட்ட சட்ட உதவிகள் மையம் மூலமாக 1 லட்ச ரூபாய் இழப்பீடாக வழங்கப்பட்டுள்ளது எனத் தெரிவிக்கப்பட்டது.
இதையடுத்து நீதிபதி, தமிழ்நாடு அரசுத் தரப்பில் பாதிக்கப்பட்ட பெண்ணுக்கு இழப்பீடு வழங்குவது குறித்து பதில் மனு தாக்கல் செய்ய தூத்துக்குடி மாவட்ட ஆட்சியருக்கு உத்தரவிட்டு வழக்கை மார்ச் 27ஆம் தேதிக்கு ஒத்திவைத்தார்.
இதையும் படிங்க: ஸ்டாலின் மீதான அவதூறு வழக்கு - தமிழ்நாடு அரசு பதிலளிக்க உத்தரவு
