மதுரை: 'ஒரு நூலகம் திறக்கப்படும்போது சிறைச்சாலை ஒன்று மூடப்படும்' என்பதை வெறுமனே பொன்மொழியாகக் கடக்க முடியாது என்பதைத்தான், காந்தி 'தனக்கு நூல்களையே பரிசாகத் தாருங்கள்' என்று கேட்டதோடு பொருத்திப் பார்க்கலாம். நூல்கள் அந்த அளவிற்கு மிக வலிமையானவை.
இதனைக் கருத்திற்கொண்டே நாடு விடுதலை பெற்ற முதலாவது ஆண்டிலேயே தமிழ்நாடு பொது நூலகச் சட்டம் 1948 இயற்றப்பட்டு, தமிழ்நாடு முழுவதும் நூலகங்கள் திறக்கப்பட்டன. இவற்றின் சேவையை அதிகரிப்பதற்காக கடந்த 1972ஆம் ஆண்டு பொது நூலக இயக்கம் உருவாக்கப்பட்டது. இதன் அடிப்படையில் தமிழ்நாடு முழுவதும் மாவட்ட நூலக ஆணைக்குழுக்கள் ஏற்படுத்தப்பட்டு, நூலகங்களின் தரம் மேம்படுத்தப்பட்டன.
மாவட்ட மைய நூலகங்கள் 32, கிளை நூலகங்கள் 1926, நடமாடும் நூலகங்கள் 14, கிராமப்புற நூலகங்கள் 1915, பகுதி நேர நூலகங்கள் 745, கன்னிமாரா நூலகம், அண்ணா நூற்றாண்டு நூலகம் ஆகியவற்றுடன் ஜூலை 15ஆம் தேதி திறப்பு விழா காணவுள்ள கலைஞர் நூற்றாண்டு நூலகம் ஆகியவையும் சேர்த்து மொத்தம் 4,635 நூலகங்கள் தமிழ்நாடு முழுவதும் இயங்கி வருகின்றன.
மேலும், சில மாவட்டங்களில் பாரம்பரியமிக்க தனியார் நூலகங்களும் உள்ளன. நூலகங்கள் எந்த அளவிற்கு முக்கியத்துவம் வாய்ந்தவையோ, அந்த அளவிற்கு அந்நூலகங்களை ஒழுங்குபடுத்தி, நெறிப்படுத்தும் நூலகர்களின் பங்கும் அளப்பரியது.
கிளை நூலகர்களுக்கு இணையான எண்ணிக்கையைக் கொண்டு விளங்கும் கிராமப்புற நூலகர்களின் பணி இதுவரை கண்டு கொள்ளப்படாமல் உள்ளது என்பதோடு, வெறும் ரூ.14 ஆயிரம் ஊதியத்தில் நூலகப்பணி செய்து வரும் இவர்களின் நீண்ட நாள் கோரிக்கைகள் அனைத்தும் கிணற்றில் போடப்பட்ட கல்லாகக் கிடக்கின்றன எனவும் குற்றம் சாட்டுகின்றனர்.
கடந்த 12 ஆண்டுகள் அனுபவம் வாய்ந்த ஊர்ப்புற நூலகர் ஒருவர் ஈடிவி பாரத் தமிழ்நாடு செய்திகளுக்கு அளித்த சிறப்பு பேட்டியில், "கடந்த 2012ஆம் ஆண்டு முதல் ஊர்ப்புற நூலகராக பணியாற்றி வருகிறேன். தமிழ்நாடு பொதுநூலகத் துறையில் முதல் நிலை நூலகம், 2ஆம் நிலை நூலகர், 3ஆம் நிலை நூலகர் என்பவை நிரந்தரமான அரசுப் பணிகளாகும்.
ஆனால், தமிழ்நாடு முழுவதும் கிராமப்புற நூலகர் (வில்லேஜ் லைப்ரேரியன்) என்ற பதவியின் கீழ் 1,512 பேர் பணியாற்றி வருகின்றனர். இதுவரை நாங்கள் பணி நிரந்தரம் செய்யப்படவில்லை. அரசு ஊழியர்களுக்கென்ற பணி விதிகள் இருந்தால்தான் அவை நிரந்தரப் பணியாகக் கருதப்படும் என்கிறார்கள்.
கடந்த 2008ஆம் ஆண்டு முதல் பணியாற்றி வரும் ஊர்ப்புற நுலகர்களுக்கும் பணி விதிகளை உருவாக்கி தமிழ்நாடு அரசு நிரந்தரப்படுத்த வேண்டும் என்ற கோரிக்கையை முன் வைக்கிறேன். கடந்த 2012ஆம் ஆண்டு மாதம் 5 ஆயிரம் ரூபாயில் பணிக்குச் சேர்ந்த நான், தற்போது 13 ஆயிரத்து 800 ரூபாயை ஊதியமாகப் பெறுகிறேன்.
எங்களது வாழ்வாதாரம் மிகவும் கேள்விக்குரியதாக உள்ளது. குடும்பத்தை நடத்தக்கூடிய செலவுக்குக் கூட பணமில்லாமல் மிகவும் வறுமையில் வாடிக் கொண்டிருக்கிறோம். வரையறுக்கப்படாத பணியிடம் என்று எங்களது நூலகப்பணி ஒதுக்கி வைக்கப்பட்டுள்ளது. கடந்த 5 ஆண்டுகளில் 48 ஊர்ப்புற நூலகர்கள் பணியின்போது மரணத்தை தழுவியுள்ளனர்.
தற்போதுள்ள ஊர்ப்புற நூலகர்களில் 70 விழுக்காட்டிற்கும் மேல் 50 வயதைக் கடந்தவர்களாவர். எங்களுக்கு எந்த விதமான அரசாங்க சலுகைகளும் கிடையாது. பணி ஓய்வு பெற்ற பின்னர் மருத்துவச் செலவுக்கும் கூட பணமின்றி மிகவும் சிரமப்படும் நிலை. காரணம், பழைய பென்சன், புதிய பென்சன் என எதுவும் கிடையாது. நூலகப் பணிக்கே உரிய ஆஸ்துமா உள்ளிட்ட மூச்சுக்குழல் சார்ந்த நோய்களால் பலர் அவதிப்படுகின்றனர்.
இதனால் பெற்றோர், குழந்தைகளைக் கவனிப்பது கூட பெரும் சவாலாக உள்ளது. காலை 9 மணி முதல் 12 மணி வரையும், மாலை 4 மணி முதல் 6.30 மணி வரையும் எங்களது பணி உள்ளது. நகர்ப்புறங்களிலிருந்து கிராமப்புற நூலகங்களில் வந்து பணி செய்யும் பெரும்பாலானோர், அந்த இடைவேளை நேரத்தில் வீட்டிற்குத் திரும்ப முடியாமல், நூலகத்திலேயே தங்கி விடுகின்றனர்.
இதனால் பகுதி நேரமாக வேலை செய்வதற்கு கூட இயலாத சூழல் உள்ளது. இந்த நிலையில் காலை 9 மணிக்கும் மாலை 6.30 மணிக்கும் செயலி வாயிலாக வருகைப் பதிவு செய்ய வேண்டும். நாள்தோறும் 15-லிருந்து 20 கிலோ மீட்டர் தூரம் பயணிக்க வேண்டிய நிலை.
எங்களின் மருத்துவச் செலவுகளுக்காக மாதந்தோறும் ரூ.300 ஊதியத்திலிருந்து பிடித்தம் செய்யப்படுகிறது. மருத்துவ செலவிற்கான தொலை ரூ.5 லட்சம். குடும்ப நிவாரண நிதியாக வழங்கப்படுகிறது. ஆனால், மருத்துவ விடுப்பு கிடையாது. மிகுந்த கவலையோடும், மன உளைச்சலோடும் நாங்கள் அனைவரும் பணியாற்றி வருகிறோம்.
முன்னாள் முதலமைச்சர் கருணாநிதி நூலகங்களுக்கும், நூலகர்களுக்கும் ஆற்றிய பெரும்பணியை கருத்திற்கொண்டு அவரின் வழி வந்த தற்போதைய தமிழ்நாடு முதலமைச்சர் மு.க.ஸ்டாலின் மதுரையில் திறக்கப்படவுள்ள கலைஞர் நூற்றாண்டு நினைவு நூலக திறப்பு விழாவில் எங்களுக்கு நல்ல செய்தியைத் தர வேண்டும் என எதிர்பார்க்கிறோம். தமிழ்நாடு பள்ளிக்கல்வித்துறை அமைச்சர் அன்பில் மகேஷ் ஆவண செய்ய வேண்டும் என்பது எங்கள் அனைவரின் வேண்டுகோள்" என்றார்.
கொங்கு மண்டலத்தைச் சேர்ந்த மூத்த ஊர்ப்புற நூலகர் ஒருவர் தொலைபேசி வாயிலாக நம்மிடம் பேசியபோது, 'கடந்த 2008 ஆம் ஆண்டு பணி நியமனமான ஊர்புற நூலகர்கள் சிலரை 2011ஆம் ஆண்டு 3ஆம் நூலகர்களாக நிரந்தரப்படுத்தினார்கள். அதற்கு பிறகு தற்போது வரை நூலகங்கள் தரம் உயர்த்தப்படவில்லை. பணி உயர்வும் வழங்கப்படவில்லை.
திமுகவின் தேர்தல் அறிக்கையில், 178வதாக சிறப்பு காலமுறை ஊதியத்திலிருந்து கால முறை ஊதியத்திற்கு மாற்றம் செய்யப்படுவார்கள் என்று வாக்குறுதி அளிக்கப்பட்டது. இதுவரை அனைத்து அமைச்சர்களையும் சந்தித்தபோது ஆவண செய்வதாக உறுதியளித்தனர்.
குறிப்பாக கலைஞர் நூற்றாண்டு நினைவு நூலகம் திறக்கப்படும்போது அந்த அறிவிப்பு வெளியாகும் என கூறியுள்ளனர். அந்த நம்பிக்கையில்தான் உள்ளோம். தற்போது தமிழ்நாடு முழுவதும் 1,519 பேர் ஊர்ப்புற நூலகர்களாக பணியாற்றி வருகிறோம். அவர்களில் 65 விழுக்காட்டினர் பெண்கள். தற்போதைய நிலவரப்படி மொத்த ஊர்ப்புற நூலகங்கள் 1,921. 3ஆம் நிலை நூலகருக்கான பணியிடங்கள் 300க்கும் மேல் உள்ளன.
இதில் அனுபவம் மற்றும் தகுதியுள்ள ஊர்ப்புற நூலகர்களை பணி நியமனம் செய்யலாம். ஆனால், இதுவரை செய்யவில்லை. பணியிலிருக்கும்போது இறந்து போன ஊர்ப்புற நூலகர்களின் குடும்பங்களுக்குத் தர வேண்டிய பணப்பலன்கள் வெறும் 10 விழுக்காடு மட்டுமே வழங்கப்பட்டுள்ளன. பணி ஓய்வு பெற்ற 20 பேருக்கு, இதுவரை 15 விழுக்காடு மட்டுமே பணப்பலன்கள் வழங்கப்பட்டுள்ளன.
இவர்களுக்கும் மாதந்தோறும் ஓய்வூதியமாக ரூ.2 ஆயிரம் வழங்கப்படுகிறது. இதனை வைத்து எப்படி குடும்பத்தை நடத்துவார்கள்? பல கோடி ரூபாய் செலவில் கலைஞர் நூற்றாண்டு நூலகம் அமைக்கப்பட்டுள்ள நிலையில், ஊர்ப்புற நூலகர்களின் வேண்டுகோளுக்கும் தமிழ்நாடு அரசு செவி சாய்க்க வேண்டும்" என தெரிவித்தார்.
இதையும் படிங்க: கலைஞர் நூலகத்தின் இறுதிப் பணிகளை ஆய்வு செய்த அமைச்சர் அன்பில் மகேஷ்!
