தம்பி மரணத்தில் நீடிக்கும் மர்மம் - அண்ணனிடம் போலீசார் விசாரணை

கிருஷ்ணகிரி: ஓசூர், அடுத்த உத்தனப்பள்ளி அருகே, கூலித்தொழிலாளி சந்தேகத்துக்குரிய முறையில் இறந்தது தொடர்பாக, அவரது அண்ணனிடம் போலீசார் விசாரித்து வருகின்றனர்.

கிருஷ்ணகிரி மாவட்டம், உத்தனப்பள்ளி அடுத்த பென்னிக்கல் பகுதியைச் சேர்ந்தவர் பசவன் (47). இவரது தம்பி முனி கிருஷ்ணன் (35). அண்ணன் தம்பி இருவருக்கும் அடிக்கடி தகராறு ஏற்பட்டு வந்ததாகக் கூறப்படுகிறது. நேற்றிரவு தகராறு ஏற்படவே, காயமடைந்த முனி கிருஷ்ணன், கெலமங்கலம் ஆரம்ப சுகாதார நிலையத்திற்குச் சென்றார்.

அங்கு அவருக்கு முதலுதவி சிகிச்சையளித்து, மருத்துவர்கள் வீட்டிற்கு அனுப்பி வைத்தனர். இந்நிலையில், நேற்று காலை திடீரென முனிகிருஷ்ணன் உயிரிழந்தார். அவரது சடலத்தை அடக்கம் செய்ய உறவினர்கள் ஏற்பாடு செய்தனர். முனி கிருஷ்ணன் இறப்பில் சந்தேகம் இருப்பதாக தெரிவித்த நிலையில், சம்பவ இடத்திற்கு வந்த உத்தனப்பள்ளி காவல் துறையினர் இறந்தவரின் சடலத்தை மீட்டு தருமபுரி அரசு மருத்துவமனைக்கு அனுப்பி வைத்தனர்.

பசவன் மற்றும் முனி கிருஷ்ணனுக்குமிடையே தகராறு ஏற்படும் போதும், முனி கிருஷ்ணன் உடலில் கத்தி வெட்டு ஏற்பட்டதாகவும், அதனால் அவர் இறந்திருக்கலாம் எனவும் காவல் துறையினர் சந்தேகிக்கின்றனர். இதனால், அண்ணன் பசவனிடம் காவல் துறையினர் விசாரணை மேற்கொண்டு வருகின்றனர்.

மேலும், பிரேத பரிசோதனை அறிக்கை வந்த பின், மேற்கொண்டு நடவடிக்கை எடுக்கவிருப்பதாகவும் காவல் துறை தரப்பில் தெரிவிக்கப்பட்டது.

இதையும் படிங்க: ' குடியுரிமை சட்டத் திருத்தத்தை திரும்ப பெறவேண்டும்...' - மத்திய அரசை எச்சரித்த மாணவர்கள் !