கிருஷ்ணகிரி மாவட்டம் ஒசூரு அடுத்த சூளகிரி அருகே உள்ளது உலகம் என்னும் கிராமம். இந்தக் கிராமத்தில் 29 பட்டியலின குடும்பங்களும், 300-க்கும் மேற்பட்ட பிற்படுத்தப்பட்ட சமூகத்தைச் சேர்ந்த குடும்பங்களும் வசித்துவருகின்றனர்.
இந்தக் கிராமத்தில் ஒன்றரை ஆண்டுகளுக்கு முன்பாக சூர்ய குமார் என்னும் பட்டியலின இளைஞர், பிற்படுத்தப்பட்ட சமூகத்தைச் சேர்ந்த சரளா என்னும் சிறுமியைக் காதலித்து, கலப்புத் திருமணம் செய்துகொண்டார்.
திருமணத்தின்போது சரளா, மைனராக இருந்ததாகக் கூறப்படுகிறது. இதனால் ஆத்திரமடைந்த பெண்ணின் வீட்டார், உறவினர்கள் பட்டியலின மக்கள் வசிக்கும் பகுதிக்குச் சென்று, அங்கிருந்த இளைஞர்களையும், குடும்பத்தாரையும் சாதி ரீதியில் கடுமையான வார்த்தைகளால் பேசி, பலமாகத் தாக்கியதாகத் தெரிகிறது.
இதனால் பட்டியலின குடும்பங்கள் சார்பில் சூளகிரி காவல் நிலையத்தில் வன்கொடுமை தடுப்புச் சட்டத்தின் கீழ் புகார் கொடுத்ததாகவும், சரளாவின் குடும்பத்தார் மைனர் பெண்ணை திருமணம் செய்ததாக எதிர் வழக்கும் தொடுத்துள்ளனர். பின்னர் கிராம பஞ்சாயத்தில் இருதரப்பிலும் புகார்கள் திரும்பப் பெற்றுக்கொள்ள வேண்டுமென பேச்சுவார்த்தையில் முடிவெடுக்கப்பட்ட நிலையில், சரளாவின் பெற்றோர் வழக்கைத் திரும்பப் பெற்றுக்கொண்டுள்ளனர்.
ஆனால், பட்டியலின சமூக மக்கள் பலரும் காயப்பட்டிருந்ததால் வழக்கைத் திரும்பப் பெறாமல் இன்றளவும் நீதிமன்றத்தில் விசாரணையில் உள்ளது. இந்த நிலையில் கடந்த மாதம் 30ஆம் தேதியன்று வன்கொடுமை தடுப்புச் சட்டத்தின்கீழ் முதல் விசாரணை நடைபெற்றுள்ளது.
இதனல் ஆத்திரமடைந்த சரளாவின் உறவினர்கள் வன்கொடுமை தடுப்புச் சட்டத்தின்கீழ் பதிவான வழக்கைத் திரும்பப் பெறும்வரை, பட்டியலின குடும்பங்களுக்கு தோட்டங்களில் வேலையோ, கடைகளில் பால் முதற்கொண்டு எந்தப் பொருளையும் வழங்கக் கூடாதென உத்தரவிடப்பட்டிருக்கிறது.
மளிகைக் கடைகளில் அத்தியாவசிய பொருள்களைக்கூட பெற முடியாமல் 5 நாள்களாக பல்வேறு சிக்கல்களையும், மனரீதியான பிரச்னைகளும் சந்தித்துவருவதால் அரசு உரிய நடவடிக்கை மேற்கொள்ள வேண்டுமென 29 குடும்பங்கள் சார்பில் கோரிக்கைவிடுக்கப்பட்டுள்ளது.
இதையும் படிங்க:உபி.யில் 17 வயது பட்டியலின சிறுமியை பாலியல் வன்புணர்வு செய்தவர் கைது!
