கரூர்: அதிமுக ஆட்சியில் பொற்காலமாக இருந்த போக்குவரத்து துறை, திமுக ஆட்சியில் சீரழிந்துவிட்டதாகவும், தமிழ்நாட்டில் பொய்யை சொல்லி முதலமைச்சர் ஆட்சி செய்வதாகவும் முன்னாள் அமைச்சர் எம்.ஆர்.விஜயபாஸ்கர் விமர்சித்துள்ளார்.
கரூர் மாவட்ட அதிமுக சார்பில் கோடைகால நீர் மோர் பந்தல் திறப்பு நிகழ்ச்சி இன்று (ஏப்.20) கரூர் மினி பேருந்து நிலையம் அருகே மாவட்டச் செயலாளரும், முன்னாள் அமைச்சருமான எம்.ஆர்.விஜயபாஸ்கர் தலைமையில் நடைபெற்றது.
இதனைத்தொடர்ந்து செய்தியாளர்களை சந்தித்த எம்.ஆர்.விஜயபாஸ்கர், ''5 ஆண்டுக்கு ஒரு முறை கழகத்தின் சட்ட விதிமுறைக்கு உட்பட்டு புதிய உறுப்பினர்கள் சேர்த்தல், ஏற்கனவே உள்ள உறுப்பினர்களை புதுப்பித்தல் பணிகளுக்கு பொதுச்செயலாளர் உத்தரவின் பெயரில் 10,000 விண்ணப்பங்கள் பெறப்பட்டுள்ளன. அனைத்து ஒன்றியம், நகரம், பேரூராட்சிக்கு மாவட்ட பொறுப்பாளர்கள் நியமிக்கப்பட்டு, கரூர் மாவட்டத்தில் உறுப்பினர்கள் சேர்க்கும் பணியும் பூத்து கமிட்டி அமைக்கும் பணியும் மிகச் சிறப்பாக நடைபெற்றது. வரும் நாடாளுமன்றத் தேர்தலில் தமிழகம், பாண்டிச்சேரி உள்பட 40 தொகுதிகளிலும் பொதுச்செயலாளர் எடப்பாடி பழனிசாமி தலைமையில் அதிமுக வெற்றி பெறும்'' என்றார்.
தொடர்ந்து பேசிய அவர், ''தான் வகித்து வந்த போக்குவரத்து துறையில், கடந்த இரண்டு ஆண்டுகளாக புதிய பேருந்துகள் ஏதும் விடப்படவில்லை. இது குறித்து சட்டமன்றத்தில் எதிர்க்கட்சி என்ற அடிப்படையில் கேள்வி எழுப்பினால் 2006-2011 காலகட்டத்தில், நேரு போக்குவரத்து துறை அமைச்சராக இருந்தபோது வாங்கிய 15,000 பேருந்தை தற்போதைய அமைச்சர் கணக்கு காட்டுகிறார். அந்தப் பேருந்துகள் அனைத்தும் ஸ்கிராபுக்கு சென்றுவிட்டன'' என்றார்.
''தற்போது அரசு டீசல், மானியம் வழங்குவது குறித்து பெருமையாக சொல்லிக் கொள்கிறார்கள். டீசல் விலை உயர்ந்த போது, பொதுமக்கள் பாதிக்கப்படக்கூடாது என்பதற்காக மறைந்த முதலமைச்சர் ஜெயலலிதா தமிழகத்தில் முதன்முறையாக டீசல் மானியம் அளித்தார். சென்னையில் மூத்தகுடி மக்களுக்கு பஸ் பாஸ் வழங்கப்பட்டது. அதற்கான மானியத்தையும் அதிமுக அரசு செலுத்தியது. பொதுத்துறை நிறுவனங்களுக்கு அரசு செய்ய வேண்டிய நடைமுறை. ஆனால், திமுக அரசு இதனை சாதனையாக கூறிக் கொள்கிறது'' என்றார்.
மௌனம் காக்கும் தொழிற்சங்கங்கள்: ''திமுகவில் அங்கம் வகிக்கக்கூடிய தொழிற்சங்கங்கள் கடந்த அதிமுக ஆட்சியில், ஊதிய உயர்வு 25 சதவீதம் கேட்டதை அடுத்து அவர்களிடம் 8 சதவீதம் வரை தருவதாக பேச்சுவார்த்தை நடத்தினோம். அப்போது தேர்தல் வந்துவிட்டதால் இடைக்கால நிவாரணமாக வழங்கினோம். ஆனால், தற்போது விடியா திமுக அரசு, ஊதிய உயர்வு 5 சதவீதம் மட்டுமே அறிவித்துள்ளது.
4 ஆண்டுகளுக்கு ஒருமுறை பேச்சுவார்த்தை என விதியை மாற்றியதைக் கண்டு தொழிற்சங்கங்கள் மௌனம் காப்பதாக குற்றச்சாட்டு எழுந்துள்ளது. மூன்றாண்டுகளுக்கு ஒரு முறை பேச்சுவார்த்தை நடத்த வேண்டும் என்ற விதியை மாற்றி நான்காண்டுகளுக்கு ஒருமுறை என மாற்றி விட்டார்கள். இதனை தொழிற்சங்கங்கள் வாய் திறந்து கேட்காமல் மௌனமாக உள்ளனர். கூட்டணியில் இருந்தால் ஒரு நிலைப்பாடு, எதிர்க்கட்சியில் இருந்தால் ஒரு நிலைப்பாடு என்ற அடிப்படையில் தொழிற்சங்கங்கள் செயல்படுகிறது’’ என்றார்.
தனியார்மயத்தை திணிக்கும் திமுக: ’’ஆளுங்கட்சியாக திமுக இருந்தாலும், எல்.பி.எப். போக்குவரத்து தொழிலாளர்களுக்காக தொடர்ந்து குரல் கொடுக்கும் என்றார்கள். இப்போது அந்த குரல் எங்கே சென்றது?’’ என கேள்வி எழுப்பினார்.
''போக்குவரத்து துறையை தனியார்மயமாக மேற்கொள்ளும் நடவடிக்கையால் தொழிலாளர்களுக்கு பாதிப்பு ஏற்படும் எனக் கருதி, அன்றைய முதலமைச்சர் எடப்பாடி பழனிசாமி அதனை கைவிட்டார். தற்போது தனியார்மயம் ஆக்குவதை திமுக அரசு புகுத்தி வருகிறது.
அதிமுக ஆட்சியில் போக்குவரத்து துறை பொற்காலமாக விளங்கியது. ரூ.16,000 கோடியை போக்குவரத்து துறைக்கு முன்னாள் முதலமைச்சர் எடப்பாடி பழனிசாமி வழங்கினார். தற்போது போக்குவரத்து துறை மிகமிக மோசமடைந்து நலிவடைந்து வருகிறது. பிரேக் ஷூ, ஹெட்லைட் போன்றவற்றை டிரைவர் கண்டக்டர் வாங்கி போட்டு பயன்படுத்தும் நிலை உள்ளது. சாலையில் எங்கு பார்த்தாலும் பேருந்துகள் பிரேக் டவுன் ஆகி நிற்கிறது'' என்று தெரிவித்தார்.
மேலும் பேசிய அவர், ’’பொய்யை மட்டுமே பேசிய ஆட்சி நடத்தும் தமிழகத்தின் பொம்மை முதலமைச்சரையும், இந்த ஆட்சியை எப்போது வீட்டுக்கு அனுப்புவோம் என தமிழக மக்கள் எதிர்பார்த்து உள்ளார்கள். பாராளுமன்றத்தோடு சேர்த்து சட்டமன்றத் தேர்தலை எப்போது நடத்தினாலும் அதிமுக பொதுச்செயலாளர் எடப்பாடி பழனிசாமி தலைமையில் அனைத்து தடைகளும் உடைத்து புதுச்சேரி உள்ளிட்ட 40 தொகுதிகளையும் அதிமுக மகத்தான வெற்றியை பெறும்'’ என்றார்.
இந்நிகழ்வில் மாவட்ட அவைத்தலைவர் திருவிக நகர செயலாளர் நெடுஞ்செழியன் உள்ளிட்ட மாவட்ட அளவிலான கட்சி நிர்வாகிகள் ஏராளமானோர் கலந்துகொண்டனர். நீர் மோர் பந்தலை திறந்து வைத்து இளநீர், தர்ப்பூசணி, குளிர்பானம், வெள்ளரிக்காய், மற்றும் நீர்மோர் ஆகியவற்றை பொதுமக்களுக்கு வழங்கினார்.
இதையும் படிங்க: ''தனி கட்சியா?''.. ஆதரவாளரின் கேள்விக்கு ஓபிஎஸ் பதில்
