செல்போனில் பாலியல் தொந்தரவு தந்த நபர் - கட்டி வைத்து உதைத்த மக்கள்!

கன்னியாகுமரி:   செல்போனில் பாலியல் தொல்லை கொடுத்த நபரை மக்கள் கட்டிவைத்து உதைத்த சம்பவம் நாகர்கோவில் பகுதியில்  பரபரப்பை ஏற்படுத்தியுள்ளது.

கன்னியாகுமரி மாவட்டம் நாகர்கோவில் மீனாட்சிபுரம் பகுதியைச் சேர்ந்தவர் சுப்பிரமணியன். இவர் ஒரு மாதத்திற்கு முன்பு மனைவிக்காக துணிக்கடை ஒன்றை அமைத்து கொடுத்ததையடுத்து, அதனை அவரது மனைவி நிர்வகித்து வருகிறார்.

இந்நிலையில், 10 நாட்களுக்கு முன்பு துணி வாங்குவது போன்று ஈசன்தங்கு பகுதியைச் சேர்ந்த ராம்பிரபு (37) கடைக்கு வந்துள்ளார். அன்றைய தினமே, சுப்பிரமணியின் மனைவியிடம் இரட்டை அர்த்த வார்த்தைகளால் பேசியிருக்கிறார். இதனால் அன்று கடையிலிருந்து விரட்டப்பட்ட அவர், விளம்பரப் பலகையிலிருந்து சுப்பிரமணியன் மனைவியின் செல்போன் நம்பரை எடுத்துச் சென்றதோடு அன்று இரவிலிருந்தே தொலைப்பேசி வாயிலாகத் தொடர் பாலியல் தொல்லை கொடுக்கும் வகையில் ஆபாச வார்த்தைகளால் பேசி வந்துள்ளார்.

இதனைப் பலமுறை கண்டித்தும் கேட்காத நிலையில், கோட்டாறு காவல் நிலையத்தில் சுப்பிரமணியன் புகார் அளித்துள்ளார். ஆனால், காவல்துறையினர் இது சைபர் குற்றப்பிரிவு காவலர்களால் விசாரிக்கப்பட வேண்டியது என அலட்சியம் காட்டியுள்ளனர். ராம்பிரபு கொடுத்த தொடர் தொல்லைகளால், சுப்பிரமணியனும் அவரது மனைவியும் கடும் மன உளைச்சலுக்கு ஆளாகியிருக்கின்றனர்.

இதனால் அந்த நபரை கையும் களவுமாகப் பிடித்துக் காவல் துறையினரிடம் ஒப்படைக்கலாம் என்கிற எண்ணத்தில் வேறொரு எண்ணிலிருந்து சுப்பிரமணி வேறு ஒரு பெண் மூலம் பேசி அந்த நபருக்கு வலை வீசியுள்ளார். இதில், எந்தவித சந்தேகமும் இல்லாத நிலையில் ராம்பிரபு இச்சை கொண்டு சுப்பிரமணியனின் துணிக்கடை அருகே வந்துள்ளார்.

அப்பொழுது, அங்கு ஒளிந்திருந்த சுப்பிரமணி, அவரது நண்பர்கள் ராம்பிரபுவை பிடிக்க முயன்றுள்ளனர். ஆனால், அவர்களைச் சரமாரியாகத் தாக்கி ராம்பிரபு அங்கிருந்து ஓடியுள்ளார். இதனைப் பார்த்த பொதுமக்கள், ராம்பிரபுவை விரட்டி பிடித்து, கட்டி வைத்ததோடு அடியும் கொடுத்தனர். தகவலறிந்து, சம்பவ இடத்திற்கு வந்த கோட்டார் காவல்துறையினர், ராம்பிரபு-வை மீட்டு காவல்நிலையம் கொண்டு சென்றனர்.

இந்த நபர் குறித்து முன்பே புகார் அளித்தும் கோட்டார் காவல்துறையினர் கண்டுகொள்ளாததால்தான் இப்பிரச்னை இந்த அளவிற்கு வளர்ந்துள்ளது என்று அப்பகுதி மக்கள் குற்றம் சாட்டியுள்ளனர்.