சர்வதேச சுற்றுலா தலமான கன்னியாகுமரியில் தினமும் ஆயிரக்கணக்கான வெளிநாடு, உள்நாட்டு சுற்றுலாப் பயணிகள் வந்து செல்கின்றனர். இதனால் சர்வதேச தரத்தில் கன்னியாகுமரியை உயர்த்த வேண்டும் என்று கோடிக்கணக்கில் திட்டப்பணிகள் மும்முரமாக நடைபெற்று வருகிறது.
இந்நிலையில் கன்னியாகுமரியில் இருந்து காஷ்மீர் செல்லும் சாலையின் தொடக்கப் பகுதியில் 50 லட்சம் ரூபாய் செலவில் 24 மணி நேரமும் ஒளிரும் அலங்கார மின் விளக்குகளுடன் 125 அடி உயரத்தில் தேசிய கொடிக் கம்பம் அமைக்கப்பட உள்ளது, இதற்கு நாடாளுமன்ற மேலவை உறுப்பினர் விஜயகுமார் இன்று அடிக்கல் நாட்டினார்.
பின்னர் செய்தியாளர்களை சந்தித்த அவர் "உலகத்தில் எந்த ஒரு பகுதியிலும் முக்கடல் சந்திக்கவில்லை, தமிழ்நாட்டில் அதுவும் கன்னியாகுமரியில் மட்டுமே முக்கடல் சங்கமம் உள்ளது. எனவே இதை உலக அதிசயங்களில் ஒன்றாக எட்டாவது அதிசயமாக மாற்ற முயற்சிகள் மேற்கொண்டு வருகிறேன். இதுகுறித்து முதலமைச்சரிடம் மனு கொடுத்துள்ளேன். மேலும் நடைபெற இருக்கும் நாடாளுமன்றத்திலும் இதுகுறித்து பேசுவேன்"என்றார்.
