குமரி: உலக அளவில் மிகவும் பிரபலமான விளையாட்டு போட்டிகளில் ஸ்ட்ராங் மேன் போட்டிகள் முக்கியத்துவம் வாய்ந்தவை. இந்த போட்டியில் சர்வதேச அளவில் பங்கேற்கும் வீரர்கள் சாதாரணமாக இல்லாமல் தங்கள் உடல் எடையை விட பல மடங்கு எடை கொண்ட பொருட்களை தூக்கி சாதனை படைத்து வருகின்றனர். ஆனால், மேற்கத்திய நாடுகளைப் போல இந்திய அளவில் இந்த போட்டிகள் பெரிய அளவில் பிரபலம் அடையவில்லை. இந்தப் போட்டிகள் குறித்து போதிய விழிப்புணர்வும் இல்லை.
இந்நிலையில் குமரி மாவட்டத்தைச் சேர்ந்த கண்ணன் என்ற இளைஞர், இந்திய அளவில் பல்வேறு ஸ்ட்ராங் மேன் சாதனைகள் புரிந்து வருகிறார். ஏற்கனவே, 13.5 டன் எடை கொண்ட லாரியை 111 மீட்டர் இழுத்து தேசிய அளவில் சாதனைப் படைத்துள்ளார். இதன் தொடர்ச்சியாக இன்று 370 கிலோ எடை கொண்ட காரை 25 மீட்டர் தூக்கி நடந்து உலக சாதனைப் படைத்துள்ளார்.
இதனை நேரில் ஆய்வு செய்த சோழன் புக் ஆப் ரெக்கார்டு நிறுவனம் அவருக்கு இந்த உலக சாதனை சான்றிதழ் மற்றும் பதக்கத்தை வழங்கியது. ஏற்கனவே உலக சாதனையாக 155 கிலோ கொண்ட அமெரிக்காவைச் சேர்ந்த ஒருவர் 435 கிலோ காரை 25 மீட்டர் தூக்கி நடந்து சாதனைப் படைத்துள்ளார்.
இந்நிலையில் வெறும் 90 கிலோ உடல் எடை கொண்ட கண்ணன், தனது எடையை விட 4 மடங்கு எடை கொண்ட காரை Yolk walk யோக் வாக் என்ற முறைப்படி காரை தூக்கி நடந்து புதிய உலக சாதனைப் படைத்துள்ளார். இந்த சாதனை நிகழ்ச்சியில் தமிழ்நாடு தொழில் நுட்பவியல் துறை அமைச்சர் மனோ தங்கராஜ், நாகர்கோவில் மாநகர மேயர் மகேஷ் உட்பட ஏராளமான பொதுமக்கள் கலந்துகொண்டு கண்ணனை கைதட்டி ஆரவாரம் செய்து பதக்கம் மற்றும் சான்றிதழ் வழங்கி கௌரவப்படுத்தினார்.
அரசு தரப்பில் ஊக்கம் அளித்தால் தமிழ்நாட்டிற்கும், இந்தியாவிற்கும் உலக அளவில் போட்டிகளில் கலந்து சாதனை படைத்தது நாட்டுக்கு பெருமை சேர்ப்பேன் என்றும்; அரசுப் பணி தந்து எங்களை போன்றவர்களை ஊக்கபடுத்த தமிழ்நாடு அரசு முன் வரவேண்டும் எனவும் தனது கோரிக்கையை அரசுக்கு விடுத்துள்ளார். கண்ணன், உலக அளவில் பஞ்சாபில் அடுத்த மாதம் 26ஆம் தேதி நடைபெறவுள்ள ஸ்ட்ராங் மேன் போட்டிக்கு தேர்வாகியுள்ளார் என்பது குறிப்பிடத்தக்கது.
இதையும் படிங்க: இளநிலை எழுத்தர் தேர்வு வினாத்தாள் லீக்கானதால் தேர்வு ரத்து
