காஞ்சிபுரம் மாவட்டம், ஸ்ரீபெரும்புதூரை அடுத்த ஆரணிசேரி பகுதியைச்சேர்ந்த நண்பர்கள், பாலகிருஷ்ணன் மற்றும் கருணாகரன். இதில் பாலகிருஷ்ணன் சுங்குவார்சத்திரம் அருகே தனியார் கண்ணாடி தொழிற்சாலையில் பணிபுரிந்து வருகிறார். மேலும் சொந்தமாக ’டாட்டா ஏஸ்’ என்ற மினி லாரி வைத்து டிராவல்ஸ் நடத்தி வருகிறார். அந்த வாகனத்திற்கு கருணாகரன் என்பவர் ஓட்டுநராகப் பணிபுரிந்து வருகிறார்.
நேற்று இரவு காஞ்சிபுரத்தில் நடைபெற்ற தனது நண்பரின் பிறந்தநாள் கொண்டாட்டத்தில் கலந்து கொள்ள இருவரும் இருசக்கர வாகனத்தில் காஞ்சிபுரம் வந்தனர். பின்பு, பிறந்தநாள் விழா கொண்டாடப்பட்டதில் இருவரும் மது அருந்தியதாக கூறப்படுகின்றது. பின்னர் இருவரும் மது போதையில் தங்களது இருசக்கர வாகனத்தில் தங்களது சொந்த ஊருக்கு, ஏனாத்தூர் வழியாக தேசிய நெடுஞ்சாலைக்குச் செல்லும் சாலையில் சென்றுள்ளனர்.
அப்போது அங்கிருந்த தரைப்பாலத்தில், இரவு நேரத்தில் போதிய வெளிச்சமில்லாததால் பாலத்தின் மீது மோதி நிலைதடுமாறி இருசக்கர வாகனத்தோடு கீழே விழுந்தனர். பாலத்தின் கீழே தண்ணீர் தேங்கி இருந்த காரணத்தினால் மூச்சுத்திணறி பாலகிருஷ்ணன் என்பவர் நீரில் மூழ்கி சம்பவ இடத்திலேயே பலியானார்.
மேலும் இது குறித்து தகவலறிந்த காஞ்சி தாலுகா காவல்துறையினர் மற்றும் தீயணைப்புத்துறையினர் சம்பவ இடத்திற்கு விரைந்து வந்து இறந்து போன பாலகிருஷ்ணன் உடலை மீட்டும், உயிருக்குப் போராடிக்கொண்டிருந்த கருணாகரனை மீட்டு காஞ்சிபுரம் மாவட்ட அரசு தலைமை மருத்துவமனைக்கும் சிகிச்சைக்காக அனுமதித்தனர். அங்கு சிகிச்சைப் பெற்று வந்த நிலையில் கருணாகரன் சிகிச்சைப் பலனின்றி பரிதாபமாக உயிரிழந்தார்.
இது குறித்து காஞ்சி தாலுகா போலீசார் வழக்குப்பதிவு செய்து விசாரணை மேற்கொண்டு வருகின்றனர். மேலும் பிறந்தநாள் கொண்டாட்ட விழாவில் கலந்து கொண்டு மது அருந்திய காரணத்தினால், இந்த விபத்து ஏற்பட்டு இருக்கலாம் என போலீசாரின் முதற்கட்ட விசாரணையில் தெரியவந்துள்ளது. ஒரே கிராமத்தைச் சேர்ந்த நண்பர்களான இரண்டு இளைஞர்கள் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
இதையும் படிங்க: பெற்றோரை இழந்த மாணவியிடம் ரூ.29 லட்சம் கேட்கும் எல்ஐசி... களத்தில் இறங்கிய நிர்மலா சீதாராமன்...
