சென்னையை அடுத்த காட்டாங்களத்தூர் அருகே உள்ள பொத்தேரியில் அமைந்துள்ளது எஸ்ஆர்எம் தனியார் கல்லூரி. இங்கு பயிலும் மாணவர்களுக்கிடையே கல்லூரி வளாகத்திற்குள் மோதல் ஏற்பட்டுள்ளது. இந்த மோதலில், மாணவர்கள் கையில் துப்பாக்கி, பட்டாக்கத்தி உள்ளிட்ட பயங்கர ஆயுதங்களுடன் தாக்கிக்கொண்டனர்.
இருதரப்பு மாணவர்கள் மோதலில் ஈடுபட்டிருப்பதை, அந்த கல்லூரியில் பயிலும் மாணவர்கள் செல்போனில் பதிவு செய்துள்ளனர். அந்தக் காட்சி தற்போது சமூக வலைதளங்களில் வைரலாகப் பரவிவருகிறது.
இதுகுறித்து தகவலறிந்து சம்பவ இடத்திற்கு விரைந்து வந்த காவல் துறையினர் மோதலில் ஈடுபட்ட மாணவர்கள் குறித்து விசாரணை நடத்தி வருகின்றனர். மேலும், செல்போனில் பதிவான காணொளி காட்சிகளை வைத்து மாணவர்களைத் தேடும் பணியில் காவல் துறையினர் தீவரம் காட்டிவருகின்றனர்.
இதேபோல், கடந்த ஆண்டும் ஒரு ரவுடியின் பிறந்தநாள் விழாவை, கல்லூரி வளாகத்திற்குள் வைத்து நீளமான பட்டாக்கத்தியில் கேக் வெட்டி கொண்டாடிய சம்பவமும் இக்கல்லூரியில் அரங்கேறியுள்ளது.
மேலும், கடந்த ஆண்டு வண்டலூர் அருகே உள்ள வேங்கடமங்கலம் என்ற பகுதியில் கல்லூரி மாணவன் முகேஷ் என்பவரை அவரது நண்பர் துப்பாக்கியால் சுட்டுக் கொன்ற சம்பவம் ஒருபுறம்.
முன்பெல்லாம் ரவுடிகளின் கைகளில் வலம்வந்த கள்ளத்துப்பாக்கிகள் தற்போது கல்லூரி மாணவர்கள் இடையே சுலபமாகப் பயன்படுத்தப்பட்டு வருகிறது. கல்லூரி மாணவர்கள் கையில் எவ்வாறு துப்பாக்கி வந்தது, மாணவர்களுக்கு, ரவுடிகளுடன் தொடர்பு உண்டா என்பது குறித்து காவல் துறையினர் தீவிரமாக விசாரணை மேற்கொண்டு வருகின்றனர்.
இதையும் படிங்க: சொத்து தகராறு: மகனைத் துப்பாக்கியால் சுட்டுக்கொன்ற தந்தை
