காஞ்சிபுரம் மாவட்டம் ஸ்ரீபெரும்புதூர் விவேகானந்தா பள்ளி தெருவைச் சேர்ந்தவர் ராமச்சந்திரன் (31). இவர் இருங்காட்டுக்கோட்டையில் உள்ள தனியார் நிறுவனத்தில் மேற்பார்வையாளராக பணிபுரிந்து வருகிறார். மேலும், இவருக்கும் அதே நிறுவனத்தில் பணிபுரியும் ஒரு பெண்ணிற்கும் நெருங்கிய தொடர்பு இருப்பதாக கூறப்படுகிறது.
இதனால், ராமச்சந்திரன் அடிக்கடி இருங்காட்டுக்கோட்டையிலுள்ள அப்பெண்ணின் வீட்டிற்கு வந்து சென்றுள்ளார். மேலும், அப்பெண்னின் அக்கா மகளான 15 வயது சிறுமியும் அங்கு தங்கியிருந்துள்ளார். இந்நிலையில், அப்பெண்ணின் வீட்டிற்குச் சென்ற ராமச்சந்திரன், வீட்டில் யாரும் இல்லாத நேரம் பார்த்து 15 வயது சிறுமிக்கு குளிர்பானத்தில் மயக்க மருந்து கொடுத்து பாலியல் வன்புணர்வில் ஈடுபட்டுள்ளார்.
இதனால், ஒரு சில மாதங்களுக்குப் பிறகு அச்சிறுமி கர்ப்பமாகியுள்ளார். இதனையறிந்த அவரது பெற்றோர் அதிர்ச்சியடைந்துள்ளனர். மேலும், இது குறித்து வெளியில் யாருக்கும் தெரியாதபடி கர்ப்பத்தை கலைப்பதற்காக எக்மோர் அரசு மருத்துவமனைக்குச் சென்றுள்ளனர். அப்போது, சிறுமிக்கு சிகிச்சையளித்த மருத்துவர்கள் இது குறித்து ஸ்ரீபெரும்புதூர் காவல் துறையினருக்குத் தகவல் தெரிவித்துள்ளனர்.
இதையடுத்து, சம்பவ இடத்திற்கு விரைந்து வந்த காவல் துறையினர், சிறுமியிடம் நடத்திய விசாரணையில் தனது சித்தியுடன் பணிபுரியும் நபர் மீது புகார் கொடுத்துள்ளார். இதையடுத்து, ராமச்சந்திரனை போக்சோ சட்டத்தில் கைது செய்த காவல் துறையினர் அவரிடம் தொடர் விசாரணை மேற்கொண்டு வருகின்றனர்.
இதையும் படிங்க: "எங்களை கருணை கொலை செய்யுங்கள்" - மனவளர்ச்சி குன்றிய சிறுமியுடன் தாய் கதறல்!
