ஈரோடு மாவட்டம், கோபிசெட்டிபாளையம் அருகே உள்ள கவுந்தப்பாடி சலங்கைபாளைத்தில் அதிமுக கட்சியின் மாவட்ட மாணவரணி சார்பில் மொழிப்போர் தியாகிகள் வீரவணக்கப்பொதுக்கூட்டம் நடைபெற்றது. இக்கூட்டத்தில் பள்ளிக்கல்வித்துறை அமைச்சர் கே.ஏ.செங்கோட்டையன், சுற்றுச்சூழல்துறை அமைச்சர் கே.சி.கருப்பண்ணன் ஆகியோர் பங்கேற்று சிறப்புரையாற்றினர்.
முதலில் பேசிய அமைச்சர் கருப்பண்ணன், தியாகிகள் வீரவணக்கப்பொதுக்கூட்டம் என்றவுடன் சுதந்திரப்போராட்டத் தியாகிகள் பொதுக்கூட்டம் என்று தனது பேச்சைத் தொடங்கினார். தியாகிகள் பல அடிகளை வாங்கிக்கொண்டு 'ஜெய்ஹிந்த்' என்று முழக்கமிட்டு சுதந்திரத்தை வாங்கி கொடுத்தார்கள் எனத் தெரிவித்தார். இதை கேட்டுக்கொண்டிருந்த அமைச்சர் செங்கோட்டையன் சற்று, குழப்பம் அடைந்து கருப்பண்ணனைப் பார்த்தார்.
இருப்பினும் விடாமல் தொடர்ந்து பேசிய அமைச்சர் கருப்பண்ணன், 'காந்தி, சுபாஷ் சந்திரபோஸ் போன்றவர்கள் மிகவும் கஷ்டப்பட்டு நமக்கு இந்த சுதந்திரத்தைப் பெற்று கொடுத்துள்ளனர். அதனால் தான் இந்திய நல்ல நாடாகத் திகழ்வதாக' தெரிவித்தார்.
மேலும் 'அடுத்து வரும் உள்ளாட்சித் தேர்தலில் அதிமுகவினர் பொறாமை கொள்ளாமல் நான், நீ என்று போட்டிபோடாமல் உங்களில் ஒருவரைத் தேர்ந்தெடுத்து போட்டியிட வையுங்கள். திமுக போல் வாரிசு அரசியல் அதிமுகவில் இல்லை' என்றும் தெரிவித்தார்.
மொழிப்போர் தியாகிகள் வீரவணக்க நாள் விழாவுக்குச் சென்று, இந்திய சுதந்திரப் போராட்ட தியாகிகள் குறித்து பேசிய அமைச்சர் கருப்பண்ணனின் பேச்சால் பொதுமக்கள் மற்றும் அதிமுக கட்சி நிர்வாகிகள் கடும் குழப்பத்திற்குள்ளாகினர்.
இதையும் படிங்க: ‘குடமுழுக்கென்றால் திராவிடம்... கும்பாபிஷேகமென்றால் ஆரியம்’ - வீரமணி பேச்சு
