கோபிசெட்டிபாளையம் அருகே உள்ள கொடிவேரி தடுப்பணையிலிருந்து கடந்த மாதம் தடப்பள்ளி அரக்கன்கோட்டை பாசன வாய்க்கால்களுக்கு முதல்போக சாகுபடிக்கு தண்ணீர் திறக்கப்பட்டது.
இதனால் தடப்பள்ளி, அரக்கன்கோட்டை, காலிங்கராயன் ஆகிய மூன்று பாசன வாய்க்கால்கள் மூலம் சுமார் 40 ஆயிரம் ஏக்கருக்கும் மேல் நேரடி பாசனம் பெறுகின்றன.
இந்நிலையில், நெல் நடவு பணிகளுக்கு கூலியாட்கள் பற்றாக்குறை, கால விரயம் ஆகியவற்றை மனதில் கொண்டு பல விவசாயிகள், இயந்திர நெல் நடவு முறையில் ஒற்றை நாற்று நடவிற்கு திரும்பியுள்ளனர்.
இது குறித்து விவசாயிகள் கூறுகையில், "ஏக்கர் ஒன்றுக்கு 10 கிலோவரை விதை நெல் மிகுதியாக கிடைக்கும். அறுவடையை முன்னமே செய்யமுடியும். ஒற்றை நாற்று நடவுமுறையைப் பயன்படுத்தும்போது களை எடுப்பதற்கும் இயந்திரத்தையே பயன்படுத்தலாம். இயந்திரம் மூலம் அறுவடை மேற்கொள்வது வசதியாக உள்ளது" என்றனர்.
இந்நிலையில், கோபிசெட்டிபாளையம் கருங்கரடு பகுதியில் நேற்று நடைபெறும் இயந்திர நெல் நடவுப்பணியை, ஈரோடு மாவட்ட துணை இயக்குநர் பிரேமலதா நாற்று எடுத்துக்கொடுத்து தொடங்கிவைத்தார்.
பின்னர் இந்திய நாற்றுநடவு குறித்து பேசிய அவர், "இயந்திர ஒற்றை நாற்று நடவு முறையால் மகசூல் அதிகரிக்கும். கூலியாட்கள் பற்றாக்குறையைப் போக்கமுடியும். விதைநெல்லும் குறைந்தளவே போதுமானது. நாற்று நடலுக்கு குறைந்த நாட்களே போதுமானது.
ஈரோடு மாவட்டத்தில் இயந்திர நெல் நடவிற்கு இந்தாண்டு 800 ஹெக்டேர் நிர்ணயம் செய்யப்பட்டுள்ளது. கோபிசெட்டிபாளையம் பகுதியில் 200 ஹெக்டேர் நிலங்களில் இயந்திர நெல் நடவுப்பணி மேற்கொள்ளப்படவுள்ளது" எனத் தெரிவித்தார்.
இந்த இயந்திர நெல் நடவுப்பணி தொடக்கத்திற்கு, கோவை வேளாண்மை பல்கலைக்கழக மாணவிகள், ஜெகேகே வேளாண்மை கல்லூரி மாணவிகள், குமரகுரு வேளாண்மை கல்லூரி மாணவிகள் என 20-க்கும் மேற்பட்ட மாணவிகள் பங்கேற்று நாற்றுகளை இயந்திரங்களுக்கு எடுத்துக்கொடுத்தும், உரங்கள் தூவியும் விவசாயிகளுக்கு உறுதுணை புரிந்ததுடன் இயந்திர நெல் நடவுமுறை குறித்து களப்பணியில் ஈடுபட்டு நெல் நடவுப் பணியை கற்றுக்கொண்டனர்.
இந்த நிகழ்வின்போது கோபிசெட்டிபாளையம் வட்டார வேளாண்மை உதவி இயக்குநர் ஜீவதயாளன் வட்டார தொழில்நுட்ப மேலாளர் அரவிந்தன், ராஜா உள்பட பலர் கலந்துகொண்டனர்.
