தனியார் மருத்துமனைகள் கரோனா கட்டணம் எவ்வளவு வசூலிக்க வேண்டும் என்பது குறித்து இந்திய மருத்துவச் சங்கத்தினர் அரசிற்கு பரிந்துரை கடிதம் ஒன்றை அளித்திருந்தனர். இதுதொடர்பாக இந்திய மருத்துவச் சங்கத்தின் மாநிலத் தலைவர் சி.என். ராஜா ஈடிவி பாரத்திற்கு அளித்த பேட்டியில், "தனியார் மருத்துவமனைகள் கரோனா சிகிச்சைக்கு அதிகமாகக் கட்டணம் வசூலிப்பதாக ஊடகங்களில் தகவல் வந்தது.
இந்தப் புகார் அரசிற்கும் சென்றது. இதனால், கரோனா சிகிச்சைக்கு என்ன செலவாகும் என்பதை இந்திய மருத்துவச் சங்கம் வரையறுத்தது. இதில், அறிகுறி இல்லாதவர்கள் தவிர்த்து லேசான பாதிப்பு, தீவிரப் பாதிப்பு ஆகியவற்றுக்கு எவ்வளவு செலவாகும் என்ற பட்டியல் தயாரித்தோம். அரசு அறிவித்த மருந்துகள், உபகரணங்கள், பரிசோதனைகள் ஆகியவற்றைக் கருத்தில்கொண்டு இந்தப் பட்டியல் தயாரிக்கப்பட்டுள்ளது.
சாதாரணமாக ஒரு நோயாளிக்கு ஐ.சி.யு. பிரிவில் நாள் ஒன்றுக்கு 23 ஆயிரம் ரூபாய் வரை மருத்துவர்கள், செவிலியர் ஊதியம் தவிர்த்து செலவு ஏற்படுகிறது. குஜராத் மாநில அரசும் இதே தொகையைத்தான் தெரிவித்துள்ளது. உபகரணங்கள், பாதுகாப்பு உடைகள் ஆகியவற்றை வெளியில்தான் வாங்க வேண்டிய நிலையுள்ளது. இதனை எல்லாம் அரசே வழங்கினால், இன்னும் கட்டணம் குறையும். இவையனைத்தும் மக்களிடம் சென்றுசேர வேண்டும்.
கரோனா பாதிப்பு அதிகரித்துள்ள சென்னையில், மக்கள் தகுந்த இடைவெளியைக் கடைப்பிடித்தால், இன்னும் சில மாதங்களில் கரோனா நோயைக் கட்டுப்படுத்த முடியும். இல்லையெனில் சமூகப் பரவல் அதிகரித்து, மிக மிக மோசமான சூழல் ஏற்படும். தமிழ்நாட்டில் சமூகப் பரவல் இல்லை என்று கூற முடியாது. சமூகப் பரவலை நோக்கி சென்றுகொண்டிருக்கிறோம் என்பதை தினமும் வருகின்ற புள்ளி விவரங்கள் தெரிவிக்கின்றன. இந்த நிலையில் அரசுக்கு உதவிசெய்ய தயாராக இருக்கிறோம். எங்களது சேவையை இலவசமாகச் செய்யத் தயாராக இருக்கிறோம். அரசும் எங்களுக்கு இலவசமாக உபகரணங்கள் உள்ளிட்டவை செய்து கொடுத்தால் இன்னும் பாதிப்பு குறைய வாய்ப்புள்ளது.
கரோனா வைரஸ் அறிகுறியின்றி பரவும்:
85 விழுக்காடு மக்களுக்கு நோய் இருந்தாலும் அவர்களுக்கு அறிகுறி இருக்காது. ஆனால், அவர்களால் நோய் பரவ வாய்ப்புள்ளது. சர்க்கரை நோய், ரத்தக் கொதிப்பு, சிறுநீரகக் கோளாறு உள்ளவர்கள் கவனமாக இருக்க வேண்டும். அவர்கள் வீட்டில் உள்ளவர்களுடன் தள்ளியிருக்க வேண்டும். நகரத்தில் உள்ள சிறிய தனியார் மருத்துவமனைகளில் ஒரேயொரு மருத்துவர், குறைந்த அளவு செவிலியர் மட்டுமே இருப்பதால் கரோனா நோயாளிகளுக்குச் சிகிச்சை அளிப்பதில் பல சிரமங்கள் உள்ளன.
மருத்துவமனைகள் நோய்களைப் பரப்பும் மையமாக இருக்கக் கூடாது. சென்னையில் நோயின் தீவிரம் அதிகரிக்க மக்கள் அடர்த்தியே காரணம். இங்கு நோய் சுலபமாகப் பரவ வாய்ப்பு அதிகம். அறிகுறி இல்லாதவர்களைத் தனிமைப்படுத்தி வைக்க வேண்டும். அதிகமாகப் பாதிப்படைந்தவர்களுக்கு அரசு மருத்துவமனைகளில் சிகிச்சை அளிக்கலாம். தனியார் மருத்துவமனைகளில் கரோனா சிகிச்சைக்கு முதலமைச்சரின் மருத்துவக் காப்பீட்டுத் திட்டத்தின் கீழ் சிகிச்சை அளிக்கப்படும் என்று தமிழ்நாடு அரசு அறிவித்திருப்பது வரவேற்கத்தக்கது" என்றார்.
இதையும் படிங்க: மீன் ஏற்றுமதியில் சிக்கல்: அல்லல்படும் கடல் ராசாக்கள்!
