ஈரோடு: சத்தியமங்கலம் புலிகள் காப்பகம், ஆசனூர் தேசிய நெடுஞ்சாலை வழியாக கரும்பு லாரிகள் சத்தியமங்கலத்தில் உள்ள கரும்பு ஆலைக்கு பயணிக்கின்றன. ஆசனூர் அடுத்த காரப்பள்ளம் சோதனைச்சாவடி தேசிய நெடுஞ்சாலையில் கரும்புக்காக யானைகள் முகாமிடுவது வழக்கமாகிவிட்டது.
தற்போது இரவு நேரத்தில் மேல் திம்பம் மலைப்பாதையில் வாகனங்கள் செல்ல தடை விதிக்கப்பட்டதால் சரக்கு வாகனங்களின் எண்ணிக்கை குறைந்தது.
இதனால் சாலை வெறிச்சோடி காணப்பட்டது. இந்நிலையில் சாம்ராஜ்நகரில் இருந்து கோவை சென்ற கார் ஒன்று காரப்பள்ளம் சோதனைச்சாவடி அருகே சென்று கொண்டிருந்தது. காரில் குழந்தைகள், பெண்கள் என குடும்பம் அமர்ந்திருந்தனர்.
சோதனைச்சாவடி அருகே சாலையில் ஒற்றை காட்டு யானை கரும்பு துண்டுகளை சாப்பிட்டபடி நடுரோட்டில் நின்று கொண்டிருந்தது. கார் மெதுவாக அதனருகே சென்றபோது சாப்பிடும் போது இடையூறு செய்வதாக கருதிய யானை காரை துரத்தியது.
அப்போது அதில் இருந்த குழந்தைகள், பெண்கள் கதறின. ஓட்டுநர் வேகமாக காரை பின்னோக்கி இயக்கி தப்பினர். இந்த வீடியோ தற்போது சமூக வலைதளத்தில் வைரலாகி வருகிறது.
இதையும் படிங்க:2023ஆம் ஆண்டு நடக்கவிருக்கும் 'சென்னை மாரத்தான்' போட்டியின் தேதி அறிவிப்பு!
