திண்டுக்கல் மாவட்டம், ஓட்டன்சத்திரம் அருகே காமாட்சிபுரத்தை சேர்ந்தவர் கனகராஜ். இவர் அப்பகுதியில் தார் தயாரிக்கும் தொழிற்சாலையை நடத்தி வருகின்றார். தொழிற்சாலை அருகில் 5-க்கும் மேற்பட்ட கிராமங்கள் உள்ளன. இங்கு ஐயாயிரத்திற்கும் மேற்பட்ட பொதுமக்கள் வசித்து வருகின்றனர். இந்த தார் தொழிற்சாலையால் கிராம மக்கள் நோயால் பாதிக்கப்பட்டு வருகின்றனர். அதனால், தார் தொழிற்சாலையை மூடக்கோரி திண்டுக்கல் மாவட்ட ஆட்சியரிடம் பொதுமக்கள் கோரிக்கை மனு அளித்தனர்.
ஆட்சியரிடம் மனு அளித்தும் எந்த நடவடிக்கையும் இல்லை. இந்நிலையில், சில நாட்கலுக்கு முன்பு தொழிற்சாலையில் இருந்து வெளியாகும் நச்சுப்புகையால், இப்பகுதியை சேர்ந்த ஒருவர் மூச்சு விட முடியாமல் இறந்து போனார். இதனால் ஆத்திரமடைந்த காமாட்சிபுரம் கிராம மக்கள் தார் தொழிற்சாலையை மூடும் வரை கலைந்து செல்ல மாட்டோம் என்று கூறி கருப்புக் கொடியுடன் போராட்டத்தில் ஈடுபட்டனர். அக்கிராம மக்களின் போராட்டத்தினை அரசு கண்டுக் கொள்வதாக தெரியவில்லை. இதனால், விரக்தியடைந்த காமாட்சிபுரம் மக்கள் மக்களவை தேர்தலில் வாக்களிக்காமல் இந்தத் தேர்தலை புறக்கணித்தனர்.
இதையடுத்து தார் தொழிற்சாலையை முற்றுகையிட்டு போராட்டத்தில் நேற்று ஈடுபட்டனர். மேலும், இந்த சம்பவத்தில் ஒட்டன் சத்திரம் காவல் துணை கண்காணிப்பாளர் சீமைச்சாமி தார் தொழிற்சாலை நிர்வாகத்திற்கு ஆதரவாக செயல்படுவதாக வருவாய் துறை அதிகாரி பிரியாவிடம் காமாட்சிபுரம் கிராம மக்கள் முறையிட்டனர். பின்னர் இந்த தொழிற்சாலையை மூட வில்லை என்றால், தங்களது ஆதார் கார்டு, வாக்காளர் அடையாள அட்டை மற்றும் குடும்ப அட்டை ஆகியவற்றை மாவட்ட ஆட்சியர் முன்னிலையில் வட்டாட்சியர் அலுவலகத்திற்கு சென்று தீயிட்டு எரிப்போம் என்று தெரிவித்துள்ளனர்.
போராட்டத்தில் ஈடுபட முயன்ற பொதுமக்களை காவல்துறையினர் தடுத்து நிறுத்தியதால் காவல் துறை கண்காணிப்பாளருக்கும் பொதுமக்களுக்கும் வாக்குவாதம் ஏற்பட்டது.
