தமிழ்நாட்டில் முழு ஊரடங்கு காரணமாக டாஸ்மாக் கடைகள் அடைக்கப்பட்டுள்ளன. இதனால், கர்நாடக மாநிலத்திலிருந்து தமிழ்நாட்டிற்குப் பல்வேறு வகைகளில் மதுபானங்கள் கடத்தி வரப்பட்டு விற்பனை செய்யப்பட்டு வருகின்றன. இதைக் காவல் துறையினர் தடுத்து நிறுத்தி, பல இடங்களில் மது பாட்டில்களை பறிமுதல் செய்தும் வருகின்றனர்.
இந்நிலையில், கர்நாடகாவிலிருந்து ரயில் மூலம் தமிழ்நாட்டிற்கு மதுபானங்கள் கடத்தப்படுவதாக ரயில்வே காவல் துறையினருக்கு ரகசிய தகவல் கிடைத்தது. இதையடுத்து திண்டுக்கல் ரயில் நிலையத்தில் இன்று (மே 31) கர்நாடக மாநிலத்திலிருந்து தென் மாவட்டங்களுக்குச் சென்ற அனைத்து ரயில்களிலும் காவல் துறையினர் தீவிர சோதனை மேற்கொண்டனர்.
அப்போது, பெங்களூரிலிருந்து தூத்துக்குடிக்குச் சென்ற மைசூர் எக்ஸ்பிரஸ் ரயிலில், பயணிகள் இருக்கைக்கு அடியில் மதுபானங்கள் பதுக்கி வைக்கப்பட்டிருந்தது கண்டுபிடிக்கப்பட்டது. இதையடுத்து மதுபானங்களை கடத்தி வந்த தூத்துக்குடி சாயல் புரத்தைச் சேர்ந்த டிஸா (28) என்பவரை காவல்துறையினர் கைது செய்தனர்.
அவரிடமிருந்து 50 ஆயிரம் ரூபாய் மதிப்பிலான 300 மதுபாட்டில்கள் பறிமுதல் செய்யப்பட்டன. அதே ரயில் பெட்டியில் அந்தப் பெண்ணுடன் மதுபானம் கடத்தி வந்த மூன்று பேர் காவல் துறையினரைக் கண்டதும் தப்பியோடினர்.
இது குறித்து, வழக்குப்பதிவு செய்த திண்டுக்கல் ரயில்வே காவல் துறையினர், தப்பபியஓடிய மூவரை தீவிரமாகத் தேடி வருகின்றனர்.
