தருமபுரி மாவட்டம் பென்னாகரம் சட்டப்பேரவை தொகுதியில் உள்ள பெரும்பாலான மலைக்கிராமங்களுக்கு இன்னும் சாலை வசதி இல்லை. அப்படி ஒரு பகுதியான கோட்டூர் மலை கிராமத்திற்கு, கழுதைகள் மூலம் வாக்குப் பெட்டிகள் அனுப்பி வைக்கப்பட்டன. இப்பணியில் கடந்த 45 ஆண்டுகளாக ஈடுபட்டு வரும் சின்னராஜ், மலை கிராமத்தில் உள்ள பொதுமக்களுக்கு பொது விநியோகத் திட்டத்தின் மூலம் விநியோகிக்கப்படும் அரிசி, சர்க்கரை போன்றவற்றை, மாதத்தில் பதினைந்து நாட்கள் இவ்வாறு கொண்டு செல்வதற்காகவே, ரஜினி, கமல், அஜீத், விஜய், சரத்குமார் என்ற 5 கழுதைகளை வளர்த்து வருகிறார்.
தேர்தல் சமயங்களில் மின்னணு வாக்குப்பதிவு எந்திரங்கள் மற்றும் வாக்குச்சாவடிக்கு தேவையான உபகரணங்களையும், கழுதைகளைக் கொண்டே மலைப்பகுதியின் அடிவாரத்திலிருந்து மலை மேலே உள்ள கிராமத்திற்கு கொண்டு செல்கிறார் சின்னராஜ்.
வட்டுவன அள்ளி ஊராட்சிக்குட்பட்ட கோட்டூர் மலைக் கிராமத்தில், 340 வாக்காளர்கள் உள்ளனர். சாலை வசதி உள்ளிட்ட அடிப்படை வசதிகள் செய்து தராததால், வரும் சட்டப்பேரவைத் தேர்தலை புறக்கணிக்கப்போவதாக மலையடிவார பகுதியில் பதாகைகளை அம்மக்கள் வைத்துள்ளனர். இருப்பினும் தங்கள் கடமையை நிறைவேற்றும் வகையில் துணை ராணுவப் பாதுகாப்புடன் கழுதைகள் மூலம் மின்னணு வாக்குப்பதிவு எந்திரங்களை மலைக்கு மேலே கொண்டு சென்றனர், தேர்தல் நடத்தும் அலுவலர்கள்.
இதையும் படிங்க: தலைமைச் செயலகம் எதிரே 50க்கும் மேற்பட்ட விவசாயிகள் முற்றுகைப் போராட்டம்
