பொள்ளாச்சியில் கல்லூரி மாணவிகளை ஆபாசமாகப் படம் எடுத்து பாலியல் தொல்லை ஈடுபட்டு வந்த திருநாவுக்கரசு, சதீஷ், சபரிராஜன், வசந்தகுமார் ஆகிய 4 பேரை போலீசார் கைது செய்து குண்டர் சட்டத்தின் கீழ் வழக்குப் பதிவு செய்து சிறையில் அடைத்துள்ளனர். இந்நிலையில், இந்த வழக்குத் தொடர்பாக பல்வேறு அமைப்புகளும் கட்சியினரும் ஆர்ப்பாட்டம், போராட்டங்கள் நடத்தி வரும் நிலையில், இந்த பாலியல் தொல்லையில் பாதிக்கப்பட்ட பெண் உருக்கமாகப் பேசி ஆடியோ ஒன்றை வெளியிட்டுள்ளார்.
அதில் எனக்கு நடந்த கொடுமை போல் வேறு எந்த பெண்ணுக்கும் நடக்கக் கூடாது என்ற எண்ணத்தோடுதான் புகார் கொடுத்ததாகவும், இதை வைத்து சில விஷக்கிருமிகள் அரசியல் ஆதாயம் தேடுவதாகவும், அதுவும் தேர்தல் நேரத்தில் இதை வைத்து அரசியல் செய்வதால் மிகவும் மன உளைச்சலுக்கு ஆளாகி இருப்பதாகவும் தெரிவித்துள்ளார்.
மேலும், இந்த சம்பவத்தால் எங்கள் குடும்பம் தற்கொலை செய்து கொள்ளும் நிலையில் இருப்பதாகவும், இந்த வழக்கு தொடரும் முன்பு எனக்கும் என் குடும்பத்திற்கும் எந்த பாதிப்பும் வராது என போலீசார் உத்தரவாதம் அளித்ததன் பேரில் தான் நான் புகார் அளித்ததாக தெரிவித்துள்ளார். இந்த வழக்கு சம்பந்தமாக ஆதாரங்கள் இருந்தால் காவல்துறையிடம் கொடுத்து பாதிக்கப்பட்ட பெண்களுக்கு நீதி கிடைக்கும் வகையில் உதவி செய்யுமாறும் அந்த ஆடியோவில் அந்தப் பெண் தெரிவித்துள்ளார்.
