பள்ளி மாணவிக்கு பாலியல் தொல்லை கொடுத்தவர் கைது!

கோயம்புத்தூர்: சிங்காநல்லூர் பகுதியில் நண்பரின் மகளுக்கு பாலியல் தொல்லை கொடுத்தவரைக் காவல் துறையினர் போக்சோ சட்டத்தில் கைது செய்தனர்.

கோவை மாவட்டம் சிங்காநல்லூர் பகுதியைச் சேர்ந்தவர் குமார். இவருக்கு இரு மகன்களும் ஒரு மகளும் உள்ளனர். இவரது மகள் தனியார் பள்ளியில் பத்தாம் வகுப்பு படித்து வருகிறார்.

குமார் இரண்டு ஆண்டுகளுக்கு முன்பு தனியார் நிறுவனத்தில் வேலை செய்து கொண்டிருந்தார். அப்போது அந்த நிறுவனத்தில் ஓட்டுநராக வேலை செய்துகொண்டிருந்த ராமநாதபுரத்தைச் சேர்ந்த அருண்குமார் (35) என்பவருடன் நட்பு ஏற்படுள்ளது.

அருணும் அடிக்கடி குமாரின் வீட்டிற்கு வந்து பழகியுள்ளார். இந்நிலையில் மார்ச் 4ஆம் தேதி குமார் வீட்டில் யாரும் இல்லாத நேரம் பார்த்து குமாரின் மகளுக்கு அருண்குமார் பாலியல் தொந்தரவு கொடுத்துள்ளார். பின்பு, இதனை வெளியே சொல்லக் கூடாதெனவும் மிரட்டியுள்ளார்.

மேலும், மாணவி பள்ளிக்குச் செல்லும்போது எல்லாம் பின் தொடர்ந்துள்ளார். இதுகுறித்து அவரது பெற்றோரிடம் மாணவி தெரிவித்ததையடுத்து, அதிர்ச்சியடைந்த குமார் சிங்காநல்லூர் காவல் நிலையத்தில் புகார் அளித்துள்ளார்.

இந்தப் புகாரானது ராமநாதபுரம் அனைத்து மகளிர் காவல் நிலையத்திற்கு மாற்றப்பட்டு, அருண் மீது பாலியல் வழக்குப்பதிவு செய்து போக்சோ சட்டத்தின் கீழ் கைது செய்யப்பட்டு சிறையில் அடைக்கப்பட்டார்.

இதையும் படிங்க: சிறுமிக்கு பாலியல் தொல்லை கொடுத்த முதியவர் போக்சோவில் கைது!