கோவை மாநகராட்சியின் குடிநீர் வினியோகம் பிரான்ஸ் நாட்டு சூயஸ் நிறுவனத்திடம் கொடுக்கப்பட்டுள்ளது. இதனால்
பெரும் பாதிப்பு ஏற்படும் எனவும் அந்நிறுவனம் தனது கட்டுப்பாட்டில் தண்ணீர் விநியோகத்தை எடுத்துக்கொண்டால் பொதுக் குழாய்கள் அகற்றப்படும் எனக்கூறி அரசியல் கட்சிகள் மற்றும் பொதுமக்கள் தொடர்ந்து எதிர்ப்பு தெரிவித்து வந்தனர்.
தற்போது அது உண்மை என்பதை நிரூபிக்கும் விதமாக அந்நிறுவனம் தனது கெடுபிடியை ஆரம்பத்துள்ளதாக புகார் எழுந்துள்ளது. புலியகுளம் பகுதியில் உள்ள நீர்தேக்கத் தொட்டியில் தண்ணீர் சேமித்து வைக்கப்பட்டு மாநகராட்சி மற்றும் தனியார் லாரிகள் மூலமாக தண்ணீர் பிடித்து வினியோகம் செய்யப்பட்டு வருகிறது.
புலியகுளம் பகுதியில் உள்ள 69 மற்றும் 70ஆவது வார்டு மாநகராட்சிக்குட்பட்ட பொதுக் குழாய்களில் தண்ணீர் வரவில்லை என்றால் பொதுமக்கள் இந்த தண்ணீர் தொட்டியின் குழாய்களில் தண்ணீர் பிடித்துச் செல்வது வழக்கம்.
இந்நிலையில் கடந்த இரண்டு நாட்களுக்கு மேலாக தண்ணீர் தொட்டி அருகே இருக்கும் குடிநீர் குழாய்களில் தண்ணீர் பிடிக்க செல்லும் பெண்களுக்கு அனுமதி மறுக்கப்பட்டுள்ளது. பொதுமக்கள் யாரும் உள்ளே வரக்கூடாது என்பதற்காக இரும்பு கதவு மூடப்பட்டிருக்கிறது.
இதுகுறித்து அப்பகுதி பெண்கள் கேள்வி எழுப்பியதற்கு, அங்கிருந்த ஊழியர்கள் சூயஸ் நிறுவனத்தின் கட்டுப்பாட்டில் தண்ணீர் தொட்டி இருப்பதால் பொதுமக்கள் இனிமேல் யாரும் தண்ணீர் பிடிக்கக் கூடாது என கூறியுள்ளனர்.
இது தொடர்பாக மாநகராட்சியின் உதவிப் பொறியாளர் ஜோதி விநாயகம் தெரிவிக்கையில், குடிநீர் விநியோகம் சூயஸ் நிறுவனத்தின் கட்டுப்பாடில் இருந்தாலும் மாநகராட்சி உத்தரவின் பேரில்தான் அந்நிறுவனம் செயல்படுவதாக கூறினார்.
சூயஸ் நிறுவனத்தின் நடவடிக்கைக்கு எதிர்ப்பு தெரிவித்த புலியகுளம் மக்கள் அனைத்துக் கட்சி சார்பில் மாநகராட்சி ஆணையரிடம் மனு அளித்துள்ளனர். அதில் தண்ணீர் தொட்டியில் பொதுமக்கள் வழக்கம் போல் தண்ணீர் பிடிக்க அனுமதிக்க வேண்டுமெனவும் இல்லையெனில் போராட்டங்களில் ஈடுபட உள்ளதாகவும் தெரிவிக்கப்பட்டுள்ளது.
இதையும் படியுங்க: 3 ஆண்டுவரை நீடிக்கும் குடிநீர் பிரச்னை: கரூர் மக்கள் தேர்தல் புறக்கணிப்பு!
