பொதுவாக மழையின்மை காரணமாக கடும் வறட்சி ஏற்படும்போது, பொதுமக்கள் ஒன்று கூடி வருணபகவானை வழிபாடு செய்வது வழக்கம். மழை வரவேண்டும் என்பதற்காக அனைத்து மதத்தினரும் பிரார்த்தனை செய்துவருவது வழக்கம்.
இந்நிலையில், கோவை மாவட்டம் அன்னூர் அருகேயுள்ள லக்கேபாளையம் கிராமத்தில் கடந்த 6 மாதங்களாக மழை பெய்யவில்லை. இதனால் அங்கு வறட்சி, தண்ணீர் தட்டுப்பாடு நிலவிவருகிறது.
கழுதைகளுக்கு திருமணம் செய்துவைத்தால் மழை பெய்யும் என்ற நம்பிக்கையில் கழுதைகளுக்கு திருமணம் செய்வது என கிராம மக்கள் முடிவு எடுத்தனர். அதன்படி பிளக்ஸ் அடித்து, சீர்வரிசை எடுத்துவந்து இன்று சுப்பிரமணியர் கோயிலில் மேளதாளம் முழங்க திருமணம் நடத்தப்பட்டது.
ஒரு ஆண், பெண் கழுதையை மணமக்கள்போல் அலங்கரித்து மாலை அணிவித்து கோயில் முன்பு கொண்டு வந்து நிறுத்தப்பட்டது. அங்கிருந்த கிராம மக்கள் அர்ச்சனை தூவி கழுதைகளுக்கு திருமணம் நடத்திவைத்தனர்.
இது குறித்து அக்கிராமத்தைச் சேர்ந்த ஒருவர் கூறுகையில், கழுதைகளுக்கு திருமணம் செய்துவைத்தால் மழை பெய்யும் என்பது ஐதீகம். அதன்படி மழை வரவேண்டி கழுதைகளுக்கு திருமணம் நடத்தப்பட்டது என்றார்.
இத்திருமணத்திற்கு வந்தவர்கள் மொய்ப்பணம் கொடுத்துச் சென்றனர். இந்த நிகழ்ச்சியில் கலந்துகொண்டவர்களுக்கு கம்பங்கூழ் வழங்கப்பட்டது.
