கோயம்புத்தூர்: சிறுமுகை வனப்பகுதிக்குள் ராமர் என்பவர் காட்டு யானையால் தாக்கப்பட்டு இறந்து விட்டார் என மேட்டுப்பாளையத்தைச் சேர்ந்த கருப்பசாமி என்பவர் சிறுமுகை காவல் துறையினருக்குத் தகவல் தெரிவித்துள்ளார். இதனையடுத்து காவல் துறையினர் மூலம் தகவலறிந்த சிறுமுகை வனச்சரகர் செந்தில்குமார் தலைமையிலான வனத்துறையினர் தகவலளித்த கருப்பசாமி என்பவரை அழைத்துக்கொண்டு கூத்தாமண்டி தூம்புப்பள்ளம் பகுதிக்குச் சென்றனர்.
அங்கு மேட்டுப்பாளையம் ஸ்ரீரங்கன் ஓடை பகுதியைச் சேர்ந்த ராமர் என்பவர் காட்டு யானையால் தாக்கப்பட்டு அழுகிய நிலையில் இறந்து கிடந்தது தெரியவந்தது. இதனையடுத்து வனத்துறையினர் கருப்பசாமியிடம் விசாரணை மேற்கொண்டனர். விசாரணையில், கருப்பசாமியும், மேட்டுப்பாளையம் கரட்டுமேடு பகுதியைச் சேர்ந்த ராஜ்குமார், உயிரிழந்த ராமர் உள்ளிட்ட மூவரும் கோத்தகிரிக்குட்பட்ட கரிக்கையூர் அருகிலுள்ள பங்களா குழி பகுதியிலுள்ள தனியாருக்குச் சொந்தமான எஸ்டேட்டில் சட்ட விரோதமாக சந்தன மரங்களை வெட்டச்சென்ற தெரியவந்தது.
மேலும், சுமார் 4 கிலோ அளவில் சந்தன மரங்களை வெட்டி எடுத்துக்கொண்டு செல்லும் வழியில் காட்டு யானை தாக்கி ராமர் சம்பவ இடத்திலேயே உயிரிழந்ததும், மற்ற இருவரும் வெட்டிய 4 கிலோ சந்தன மரக்கட்டைகளுடன் தப்பி ஓடியதும் தெரியவந்தது. இதனையடுத்து அவரை கைது செய்த வனத்துறையினர் தப்பி ஓடிய மற்றொருவரை தேடி வருகின்றனர்.
இதற்கிடையே, சடலத்தை மீட்ட வனததுறையினர் உடற்கூராய்வுக்காக மேட்டுப்பாளையம் அரசு மருத்துவமனைக்கு அனுப்பி வைத்தனர். இச்சம்பவம் குறித்து வழக்குப்பதிவு செய்த சிறுமுகை காவல் துறையினர் தீவிர விசாரணை மேற்கொண்டு வருகின்றனர்.
இதையும் படிங்க: பெண்கள் குறித்து அருவருப்பு பேச்சு - பயில்வான் ரங்கநாதன் மீது காவல் ஆணையத்தில் புகார்
