கோயம்புத்தூர் மாவட்டம் சிறுமுகை வனச்சரக வனப் பணியாளர்கள் குழுவினர், பவானி சாகர் நீர்ப்பிடிப்பு பகுதிகளையொட்டியுள்ள பகுதிகளில் நேற்று (ஜூன் 24) மாலை ரோந்து பணியில் ஈடுபட்டனர். மயில்மொக்கை சரக பகுதியில், இறந்த சடலத்தின் துர்நாற்றம் வீசியுள்ளதால், அப்பகுதியில், தேடுதல் பணியை தொடங்கினர். இருட்டும் நேரமானதால் காட்டு யானைகள் நடமாட்டம் அதிகளவில் இருந்ததாலும் தேடுதலைத் தொடர முடியாமல் போனது.
இதையடுத்து, இன்று (ஜூன் 25) காலை அதே பகுதியில் தேடுதல் பணியை மேற்கொண்டபோது பெண் யானை ஒன்று இறந்த நிலையில் கிடந்ததைக் கண்டறிந்தனர். உடனடியாக உயர் அலுவலர்களுக்கு தகவல் தெரிவிக்கப்பட்டது. தகவலறிந்து சம்பவ இடத்திற்கு வந்த மாவட்ட வன அலுவலர் வெங்கடேஷ் முன்னிலையில், கால்நடை மருத்துவர்கள், சுகுமார், சதீஸ்குமார், தியாகராஜன் ஆகியோர் அடங்கிய மருத்துவக் குழுவினர் உடற்கூராய்வு மேற்கொண்டனர்.
பின்னர் மாவட்ட வன அலுவலர் வெங்கடேஷ் கூறுகையில், "யானை இறந்து 8 முதல் 10 நாட்கள் ஆனதால் உடல் பாகங்கள் முற்றிலும் அழுகி சிதைந்து காணப்பட்டன. சிதைவுற்ற மாதிரிகள் தடய ஆய்வு செய்வதற்காக எடுக்கப்பட்டுள்ளது. யானையின் வயது சுமார் 47 முதல் 49 வரை இருக்கும்" என தெரிவித்தார்.
வனவிலங்கு ஆர்வலர்கள் கூறியதாவது, "கோயம்புத்தூர் மாவட்ட வனப்பகுதியில் ஊரடங்கு காலத்தில் மட்டும் 10 காட்டு யானைகள் உயிரிழந்தன. இதில், சிறுமுகை வனச்சரகத்திற்குட்பட்ட பகுதிகளில் மட்டும் 6 யானைகள் உயிரிழந்தன. யானைகளின் உடற்பாகங்கள் ஆய்வுக்கு அனுப்பி வரும் நிலையில் சோதனை முடிவுகள் விரைவாக முடிவுகள் வந்தால், அதற்கான காரணம் கண்டறிந்து யானைகள் உயிரிழப்பை ஓரளவு தடுத்திட முடியும்" என தெரிவித்தனர்.
இதையும் படிங்க: தூங்கா நகருக்கு ரூ.1,000 நிவாரணம் - அரசாணை வெளியீடு
