சென்னை: ரோமியோ பிக்சர்ஸ் ராகுல் தயாரிப்பில், யூடியூப் ராஜ் மோகனின் அறிமுக இயக்கத்தில், பிரமாண்டமான உருவாக்கத்தில், பள்ளிக்கால வாழ்வை மையப்படுத்தி உருவாகியுள்ள திரைப்படம் “பாபா பிளாக் ஷீப்”. இந்தப் படத்தின் இசை வெளியீட்டு விழா நேற்று (ஜூன் 15) சென்னையில் நடைபெற்றது.
இன்றைய யூடியூப் பிரபலங்கள் பலர் இணைந்து நடித்துள்ள இப்படம், பெரும் பொருட்செலவில் நம் பள்ளி வாழ்வை அசை போட வைக்கும் அற்புதமான படைப்பாக உருவாகி உள்ளதாக தெரிவிக்கப்பட்டுள்ளது. இன்றைய 2K கிட்ஸ்களின் பள்ளிப் பருவத்தை திரையில் காட்டும் விதமாக இப்படம் உருவாகியுள்ளது.
தமிழ் திரைப் பிரபலங்கள், சின்னத்திரை நட்சத்திரங்கள், படக்குழுவினர் கலந்து கொள்ள பத்திரிக்கை ஊடக நண்பர்கள் முன்னிலையில், ஒரு கல்லூரி கலை நிகழ்வு போல் திருவிழாக் கோலமாக இவ்விழா நடைபெற்றது. இப்படத்தின் மூலம் வெள்ளித்திரைக்கு அறிமுகமாகும் புதுமுகங்களை, தமிழ் சினிமாவின் முன்னணி திரைப் பிரபலங்கள், மேடையில் ரசிகர்களுக்கு அறிமுகப்படுத்தினர்.
இதையும் படிங்க: பூஜையுடன் தொடங்கிய ‘ராமராஜன் 46’
முதலாவதாக தமிழ் திரையுலகின் முன்னணி இயக்குநர் கே.எஸ்.ரவிக்குமார், இயக்குனர் ராஜ் மோகனை மேடையில் அறிமுகப்படுத்தினார். இதனைத் தொடர்ந்து இயக்குநர் லிங்குசாமி, கதாநாயகன் நரேந்திர பிரசாத்தை அறிமுகப்படுத்தினார். இயக்குநர் கார்த்திக் சுப்புராஜ், ஹீரோ அயாஸை அறிமுகப்படுத்தினார்.
நடிகர் இளவரசு, குட்டி மூஞ்சி விவேக்கை அறிமுகப்படுத்தினார். நடிகர் மணிகண்டன், ராம் நிஷாந்த்தை அறிமுகப்படுத்தினார். இயக்குநர் ஓபேலி கிருஷ்ணா, பிரகதீஸ்வரனை அறிமுகப்படுத்தினார். நடிகர் பஞ்சு சுப்பு, குட்டி வினோவை அறிமுகப்படுத்தினார். நடிகை வாணி போஜன், சேட்டை ஷெரீப் என்பவரை அறிமுகப்படுத்தினார்.
மேலும், ஈரோடு மகேஷ் மற்றும் தர்ஷன் ஆகியோர் இணைந்து, கதாநாயகியாக அம்மு அபிராமியை அறிமுகப்படுத்தினர். தனியார் டிவி நட்சத்திரங்கள் இணைந்து, அதிர்ச்சி அருணை அறிமுகப்படுத்தினர். ரியோ மற்றும் சுட்டி அரவிந்த், ஆர்ஜே விக்னேஷை மீண்டும் மாணவனாக மேடையில் அறிமுகப்படுத்தினர்.
மேலும் இந்த நிகழ்ச்சியில், பெரும் ரசிகர் கூட்டத்தின் முன்னிலையில் இப்படத்தின் டிரெய்லர் மற்றும் இசை வெளியிடப்பட்டது. இவ்வாறு இணையத்தில் வெளியான டிரெய்லர், குறுகிய நேரத்தில் பெரும் எண்ணிக்கையிலான பார்வைகளை பெற்று சாதனை படைத்து வருகிறது. பாடல்கள் அனைத்தும் இளைஞர்களின் விருப்பமாக ப்ளேலிஸ்டில் இடம் பிடித்து வருகிறது.
ரசிகர்களிடம் பெரும் எதிர்பார்ப்பை கிளப்பியிருக்கும் இப்படம், விரைவில் திரையரங்குகளில் வெளியாகவுள்ளது. அது பற்றிய அறிவிப்பு விரைவில் அதிகாரப்பூர்வமாக வெளியாகும் என்று எதிர்பார்க்கப்படுகிறது.
இதையும் படிங்க: ஜூன் 16ல் ZEE5 ஓடிடியில் வெளியாகும் 'தமிழரசன்' திரைப்படம்!
