- நவம்பர் 8ஆம் தேதி 1680ஆம் ஆண்டு இத்தாலியில் பிறந்த கான்ஸ்டன்டைன் ஜோசப் பெஸ்கி கிறிஸ்தவ குருவாக, அம்மதத்தை பரப்புவதற்காக 1710ஆம் ஆண்டு கோவாவுக்கு வந்தார். பின்னர் அதே ஆண்டு அங்கிருந்து தமிழ்நாடு வந்து சேர்ந்தார்.
- தமிழ்நாட்டில் கிறிஸ்தவ மதத்தைப் பரப்ப தமிழ்மொழி அவசியம் என்பதை உணர்ந்த பெஸ்கி, அதற்காகத் தமிழும் கற்றார். தமிழ் அவரைத் தன்னுள் இழுத்துக்கொள்ள, சுப்ரதீபக் கவிராயரிடம் தமிழ் இலக்கணம், இலக்கியம் கற்று இலக்கியத்தில் பேருரை நடத்தும் அளவுக்கு ஊறிப்போனார் தமிழில்.
- இதனையடுத்து கான்ஸ்டன்டைன் ஜோசப் பெஸ்கி என்ற தனது இயற்பெயரை தமிழில் மாற்ற வேண்டும் என நினைத்து ’தைரியநாதன்’ என்று மாற்றியும் கொண்டார். பிறகு ’தைரியநாதன்’ என்பது சமஸ்கிருத பெயர் என்று அறிந்து, ‘வீரமாமுனிவர்’ என மாற்றிக் கொண்டார்.
- இலக்கணம், இலக்கியம், அகராதி என பலவற்றை தமிழ் மொழியில் எழுதிக் குவித்தார். திருக்குறளை லத்தீன் மொழியிலும் தேவாரம், திருப்புகழ், நன்னூல், ஆத்திச்சூடி ஆகியவற்றை பல்வேறு ஐரோப்பிய மொழிகளிலும் மொழிபெயர்த்து வெளியிட்டார்.
- அதுமட்டுமின்றி வெளிநாட்டினர் தமிழ் கற்கவும், தமிழர்கள் பிறமொழிகளைக் கற்கவும் உதவியாக தமிழ் - லத்தீன் அகராதியை உருவாக்கினார். ஆயிரம் தமிழ்ச் சொற்களுக்கு லத்தீனில் விளக்கம் கொடுத்தார். இதைத்தொடர்ந்து 4400 சொற்களைக் கொண்ட தமிழ் -போர்ச்சுகீசிய அகராதியையும் படைத்தார். சொற்களுக்கான பொருள்களைத் தருவதற்காக ஆக்கப்பட்ட நூல் நிகண்டுக்கு மாற்றாக, பெயர் அகராதி, பொருள் அகராதி, தொகை அகராதி, தொடை அகராதி ஆகிய பகுப்புகளைக் கொண்ட சதுரகராதியைத் தொகுத்தார்.தமிழ் அறிஞர் வீரமாமுனிவர்
- அந்தக் காலத்தில் சுவடிகளில் மெய் எழுத்துகளுக்குப் புள்ளி வைக்காமல் கோடு போடுவது வழக்கம். நெடில் எழுத்துகளைக் குறிக்க, ‘ர’ சேர்த்தனர். இதை மாற்றி ‘ஆ’, ‘ஏ’, ‘ஓ’ ஆகிய நெடில் எழுத்துகளைக் கொண்டுவந்தார். பல்வேறு தமிழ் இலக்கிய, இலக்கணங்கள் கவிதை வடிவில் இருந்தன. மக்கள் சிரமமின்றிப் படிக்க வேண்டும் என்ற நோக்கில் அவற்றை உரைநடையாக்கினார்.
- தொன்னூல் விளக்கம் என்ற நூலில் எழுத்து, சொல், பொருள், யாப்பு, அணி ஆகிய ஐந்து இலக்கணங்களைத் தொகுத்தார். கொடுந்தமிழ் இலக்கணம் என்ற நூலில் தமிழில் முதன்முதலாகப் பேச்சுத் தமிழை விவரித்தார்.
- உரைநடையில் வேத விளக்கம், வேதியர் ஒழுக்கம், ஞானக் கண்ணாடி, செந்தமிழ் இலக்கணம், வாமன் கதை ஆகியவற்றைப் படைத்தார். எளிய மக்களும் புரியும் வகையில் உரைநடை தொகுத்ததால், இவர் ‘உரைநடை தந்தை’ என அழைக்கப்பட்டார்.
- தமிழின் முதல் நகைச்சுவை இலக்கியம் என்று போற்றப்படும் ‘பரமார்த்த குருவின் கதை’ நூலைப் படைத்ததும் இவரே.உரைநடையின் தந்தை வீரமாமுனிவர்
- இயேசு காவியமான தேம்பாவணியை இயற்றியுள்ளார். இவரைப்போல வேறு எந்தக் காப்பியப் புலவரும் சிற்றிலக்கியம், அகராதி, இலக்கணம், உரைநடை என பல இலக்கிய வகைகளிலும் நூல்கள் படைத்ததில்லை.
- தமிழில் 23 நூல்களை எழுதிய வீரமாமுனிவர் தமிழ் மட்டுமின்றி ஒன்பது மொழிகளில் புலமைப் பெற்றவர். பெயராலும், பண்பாட்டாலும் தமிழராகவே வாழ்ந்த இவர் தனது 67ஆவது வயதில் இயற்கை எய்தினார்.
இதையும் படிக்க...பேரறிவாளனுக்கு ஒரு மாதம் பரோல்!
