சென்னை வேளச்சேரி ராம்நகரைச் சேர்ந்தவர் தியாகராஜன்(62). இவர் சேலத்தில் உள்ள 20 ஏக்கர் நிலத்தை தன் வசம் வைத்துள்ளதாக கூறப்படுகிறது. அதேநேரம், இந்த இடம் மலேசியாவைச் சேர்ந்த செல்லப்பா என்பவருக்கு சொந்தமானது எனவும் கூறப்படுகிறது. இவ்வாறு இருவரும் தங்களது இடம் எனக் கூறிக் கொள்ளும் நிலையில், இது தொடர்பாக நீதிமன்றத்தில் வழக்கு நடைபெற்று வருகிறது.
இந்நிலையில் மலேசியாவைச் சேர்ந்த செல்லப்பா, பிரபல ரவுடி சீசிங் ராஜாவை அணுகி தியாகராஜனை இடத்தை விட்டு விரட்ட வேண்டும் என கூறியுள்ளார். இதன்படி சீசிங் ராஜாவும் தனது கூட்டாளிகள் மூவரை தியாகராஜன் வீட்டிற்கே அனுப்பி வைத்துள்ளார். எனவே கூட்டாளிகள் வீட்டிற்குச் சென்றுள்ளனர்.
ஆனால், அங்கு தியாகராஜன் இல்லை. அவரது மகள் மட்டுமே இருந்துள்ளார். இந்நிலையில் அங்கு சென்ற மூவர், செல்போனை அவரது மகளிடம் கொடுக்க அதில் சீசிங் ராஜா பேசியுள்ளார். அப்போது, “நான் பெரிய ரவுடி. சேலத்தில் உள்ள இடத்தில் இருந்து உங்க அப்பாவை ஒதுங்கிவிட சொல்லு. இல்லையென்றால், குடும்பத்தோடு கொலை செய்து புதைத்து விடுவேன்” என சீசிங் ராஜா மிரட்டல் விடுத்துள்ளார்.
இதனையடுத்து காவல் கட்டுப்பாட்டு அறைக்கு அப்பெண் தகவல் அளித்துள்ளார். இதன் அடிப்படையில் வேளச்சேரி காவல்துறையினர் சம்பவ இடத்திற்குச் சென்று விசாரணை செய்து சிசிடிவி காட்சிகளை கைப்பற்றினர். மேலும் இச்சம்பவம் தொடர்பாக பிரபல ரவுடி சீசிங் ராஜா, செல்லப்பா உள்ளிட்ட நபர்கள் மீது வழக்குப்பதிவு செய்து விசாரித்து வந்தனர்.
இந்நிலையில் வில்லிவாக்கத்தைச் சேர்ந்த ரியல் எஸ்டேட் தொழில் செய்யும் கிரிஸ்டோபர்(34) மற்றும் அம்பத்தூரைச் சேர்ந்த சந்தோஷ் தேவ பிரபு(31) ஆகிய இருவரை கைது செய்த காவல்துறையினர், அவர்களை சைதாப்பேட்டை நீதிமன்றத்தில் ஆஜர்படுத்தினர். மேலும் தலைமறைவாக உள்ள செல்லப்பா, ரவுடி சீசிங் ராஜா உள்ளிட்ட மேலும் சிலரை காவல்துறையினர் தீவிரமாக தேடி வருகின்றனர்.
இதையும் படிங்க: 8 வயது சிறுமியை பாலியல் வன்கொடுமை செய்த 75 வயது முதியவர் - வீடியோ எடுத்து பகிர்ந்த 5 இளைஞர்கள் உட்பட 6 பேர் கைது!
