சென்னை: தமிழ்நாடு அரசுப் பணியாளர் தேர்வாணையம் மூலம், கடந்த 2022ஆம் ஆண்டு மே 21ஆம் தேதி குரூப் 2 முதல் நிலை தேர்வு நடைபெற்றது. இவ்வாறு முதல்நிலை தேர்வு எழுதிய 9,94,890 பேரில் 57,641 பேர் தேர்ச்சி பெற்றனர். இந்த குரூப் 2 பிரிவில் நேர்முகத் தேர்வு பதவிகளான இளநிலை வேலைவாய்ப்பு அலுவலர்கள், நன்னடத்தை அலுவலர்கள், உதவி ஆய்வாளர்கள், சார்பதிவாளர் நிலை - 2 பணிகள், மாற்றுத்திறனாளிகளுக்கான இளநிலை வேலைவாய்ப்பு அலுவலர்கள், சிறப்பு உதவியாளர், தனிப்பிரிவு உதவியாளர்கள் எனவும், குரூப்-2ஏ பிரிவில் நேர்முகத் தேர்வு அல்லாத பதவிகளில் நகராட்சி பணியாளர் ஆணையர் நிலை - 2 பணியிடங்கள், முதுநிலை ஆய்வாளர்கள் மற்றும் இளநிலை கூட்டுறவு தணிக்கையாளர்கள் உள்ளிட்ட 5,446 இடங்கள் நிரப்பப்பட உள்ளது.
இந்த நிலையில் இதற்கான முதன்மைத் தேர்வினை இன்று (பிப்.25) 27,306 ஆண் தேர்வர்கள், 27,764 பெண் தேர்வர்கள் மற்றும் மூன்றாம் பாலினத்தவர் ஒருவர் என மொத்தம் 55,071 பேர் எழுதுகின்றனர். இவர்களுக்காக 20 மாவட்டங்களில் 186 இடங்களில் 280 அறைகள் ஒதுக்கீடு செய்யப்பட்டு, தேர்வு நடைபெறுகிறது.
குறிப்பாக சென்னையில் மட்டும் 32 இடங்களில் உள்ள 38 அறைகளில் 8,315 பேர் தேர்வு எழுதுகின்றனர். இதில் தேர்வுகள் பெறும் மதிப்பெண்கள் அடிப்படையில் நேர்முகத் தேர்விற்கு தனியாக தரவரிசைப் பட்டியலும், நேர்முகத்தேர்வு அல்லாத பதவிகளுக்கு தனியாக தரவரிசைப் பட்டியல் வெளியிடப்பட்டு கலந்தாய்வும் நடத்தப்பட உள்ளது.
அதன் அடிப்படையில் துறை வாரியாக காலிப் பணியிடங்களுக்கு தேர்வு செய்யப்பட்டவர்கள் ஒதுக்கீடு செய்யப்படுவார்கள். இந்த நிலையில், இந்த தேர்வினை எழுத தேர்வர்கள் இன்று குறித்த நேரத்திற்கு தேர்வு அறையில் காத்திருந்தனர். ஆனால், சென்னை, கடலூர், சேலம், தஞ்சாவூர் மற்றும் திருநெல்வேலி உள்ளிட்ட மாவட்டங்களில் உள்ள சில தேர்வு மையங்களில் வினாத்தாள்கள் மற்றும் விடைத்தாள்கள் வழங்குவதில் குளறுபடி ஏற்பட்டது.
அதிலும், சுமார் 40,000க்கும் மேற்பட்ட தேர்வர்களுக்கு விடைத்தாள் மாறி வந்துள்ளதாக தகவல் வெளியாகி உள்ளது. மேலும் சென்னை பச்சையப்பன் கல்லூரியில் தேர்வெழுத வந்த தேர்வர்களுக்கு காலை 9.30 மணிக்கு விடைத்தாள்கள் கொடுப்பதில் தாமதம் ஏற்பட்டது.
அதேபோல் திருநெல்வேலி மாவட்டம் பாளையங்கோட்டை தூய யோவான் மேல்நிலைப்பள்ளி தேர்வு மையத்தில் வினாத்தாள் வழங்குவதில் ஏற்பட்ட குளறுபடி மற்றும் பதிவு எண்படி வினாத்தாள் வழங்குவதிலும் குளறுபடி ஏற்பட்டதால், சுமார் அரை மணி நேரத்திற்கும் மேலாக வினாத்தாள் வழங்குவதிலும் தேர்வு தொடங்குவதிலும் தாமதம் ஏற்பட்டது. இதனால் அதிருப்தி அடைந்த தேவர்கள், தேர்வு அறையில் இருந்து வெளியேறினர்.
இதனையடுத்து அங்கு வந்த பாளையங்கோட்டை வட்டாட்சியர் மற்றும் தேர்வு கட்டுப்பாட்டுத் துறை அதிகாரிகள், தேர்வர்களுடன் நடத்திய பேச்சு வார்த்தையைத் தொடர்ந்து முறையாக வினாத்தாள் விநியோகம் செய்யப்பட்டு, அரை மணி நேரம் தாமதமாக தேர்வுகள் தொடங்கியது. எனவே தேர்வர்களுக்கு கூடுதல் நேரம் ஒதுக்கப்பட்டுள்ளது எனவும், அதேநேரம் இந்த குளறுபடி குறித்து முறையான விசாரணை நடத்தப்படும் என தமிழ்நாடு அரசுப் பணியாளர் தேர்வாணையம் தெரிவித்துள்ளது.
இதையும் படிங்க: திருவள்ளுவர் பல்கலையில் 2 ஆண்டுகளாக ஆட்சிமன்ற குழு தேர்வு நிறுத்தி வைப்பு!
