தமிழ்நாடு அரசுப் பணியாளர் தேர்வாணையத்தின் செயலாளர் நந்தகுமார், தேர்வு கட்டுப்பாட்டு அலுவலர் சுதன் ஆகியோர் செய்தியாளர்களை சந்தித்தனர். அப்போது பேசிய அவர்கள், கிராமப்புற மாணவர்கள் மற்றும் தமிழ் வழியில் படித்த மாணவர்களுக்கு குரூப் - 2 பாட மாற்றத்தினால் எந்த பாதிப்பும் ஏற்படாது எனவும், நன்மை தான் ஏற்படும் எனவும் தெரிவித்தனர்.
தமிழ்நாடு அரசுப் பணியாளர் தேர்வாணையத்தின் மூலம் தலைமைச் செயலகத்தில் பணியாற்றும் அலுவலருக்கும், வருவாய் அலுவலருக்கும் தற்பொழுது ஒரே நிலையில் தேர்வு கொண்டு வரப்பட்டுள்ளதாகவும், அவர்களின் திறன்களை நேர்முகத் தேர்வினை விட எழுத்துத் தேர்வின் மூலம் நன்றாக சோதனை செய்ய முடியும் என்றும் கூறினர்.
ஏற்கனவே இருந்த முறையில் மாணவர்கள் பொதுத் தமிழ் அல்லது பொது ஆங்கிலம் ஏதாவது ஒன்றினை தேர்வு செய்து இறுதி நிலை வரை செல்ல முடியும். ஆனால் தற்பொழுது கொண்டு வந்துள்ள முறையால் தமிழ் தெரியாதவர்கள் தேர்வில் தகுதிப்பெறுவது முற்றிலும் தடுக்கப்பட்டுள்ளது.
குரூப்- 2 தேர்வில் தமிழை புறக்கணித்ததாக கூறப்படும் குற்றச்சாட்டில் உண்மையில்லை, புதிய தேர்வு முறையால் தமிழ் வழி மாணவர்களுக்கு நன்மைதான் ஏற்படும் எனவும் குரூப் 2 எழுத்துத் தேர்வில் கிராமப்புற மாணவர்கள் பாதிக்கப்படக் கூடாது என்பதற்காக பாடத்திட்டமே தற்போது வடிவமைக்கப்பட்டுள்ளதாகவும் தெரிவித்தனர்.
மேலும், டி.என்.பி.எஸ்.சி தேர்வில் ஆள்மாறாட்டம் நடைபெற வாய்ப்பில்லை என்றும், இதுவரை அதுபோன்று நடந்தது இல்லை. 2020-ஆம் ஆண்டுக்கான டிஎன்பிஎஸ்சி தேர்வு அட்டவணை ஒரு மாதத்தில் வெளியாகும் என்றும் தெரிவித்தனர்.
இதையும் படிங்க: நீட் தேர்வு ஆள்மாறாட்டம்: இருவருக்கு நீதிமன்ற காவல்!
