பொதுமக்களுக்கு இடையூறு இல்லாமல் பேனர் வைப்பதில் தவறு இல்லை - ஜெயக்குமார்

சென்னை: சட்டத்திற்கு உட்பட்டு பொதுமக்களுக்கு இடையூறு இல்லாமல் பேனர் வைப்பதில் எந்த தவறும் இல்லை என அமைச்சர் ஜெயக்குமார் தெரிவித்துள்ளார்.

சென்னை குறளகத்தில் மகாத்மா காந்தியின் 150ஆவது பிறந்த நாளையொட்டி கதர் சிறப்பு விற்பனைத் தொடக்கவிழா நடைபெற்றது. இதில் மீன்வளத்துறை அமைச்சர் ஜெயக்குமார் மற்றும் கதர்த்துறை அமைச்சர் பாஸ்கரன் ஆகியோர் கலந்து கொண்டு சுதந்திரப் போராட்ட வீரர்களுக்கு கதர்த்துணி வழங்கி சிறப்பித்தனர். பின்னர் மகாத்மா காந்தியின் சிலைக்கு மாலை அணிவித்து குத்துவிளக்கேற்றி வைத்து சிறப்பு விற்பனையை தொடக்கி வைத்தனர்.

தொடர்ந்து செய்தியாளர்களிடம் பேசிய அமைச்சர் ஜெயக்குமார், நீட் தேர்வை பொருத்தவரை தமிழ்நாட்டிற்குத் தேவை இல்லை என்பது தான் அரசின் நிலைப்பாடு. இதைத் தொடர்ந்து மத்திய அரசிடம் வலியுறுத்தி வருகிறோம். நீட் தேர்வு மத்திய அரசு நடத்துகிறது, இதில் ஆள்மாறாட்டம் போன்ற சட்ட விரோத செயல்களில் ஈடுபடுவோர் மீது தமிழ்நாடு அரசு கடுமையான நடவடிக்கை எடுக்கும்.

நடிகர் கமல் தற்போது பிக் பாஸ் நிகழ்ச்சியில் மட்டும் தான் கவனம் செலுத்துகிறார், நாட்டு மக்களின் நலனில் கவனம் செலுத்துவதில்லை. வசூல் ராஜா எம்.பிபி.எஸ் படத்தின் மூலம் நீட் தேர்வில் ஆள்மாறாட்டம் என்பதை முதலில் வித்திட்டவர் கமல் தான்.

சுபஸ்ரீ மரணத்திற்குப் பிறகு பொது இடங்களில் பேனர் வைக்க கூடாது என்று குறிப்பிட்டு இருந்தோம், ஆனால் சட்டத்திற்கு உட்பட்டு பொதுமக்களுக்கு இடையூறு இல்லாமல் பேனர் வைப்பதில் எந்த தவறும் இல்லை. காங்கிரஸ் வேட்பாளர்கள் ஏழை என்று கே.எஸ் அழகிரி சொல்வது இந்த நூற்றாண்டின் சிறந்த நகைச்சுவையாகும்.

உலகிலேயே முதலாளித்துவ கட்சி என்று ஒன்று இருந்தால் அது காங்கிரஸ் கட்சிதான். உலகில் முதல் 100 இடங்களில் உள்ள மிட்டா மிராசு தாரர்களில் காங்கிரஸ் கட்சிக்காரர்கள் தான் இருப்பார்கள்.

நள்ளிரவு 12 மணிக்கு ஒரு பெண் தன்னந்தனியாக நகைகளை அணிந்துகொண்டு சாலையில் செல்வதையே முழுமையான சுதந்திரம் கிடைத்ததாக நான் கருதுகிறேன் என்று காந்தி சொன்னார் அந்த நிலை தமிழகத்தில் தான் இன்றும் உள்ளது. சினிமாவுக்கு சென்று விட்டு இரவு ஒரு மணிக்கு தனியாக செல்லலாம் அதற்கு நான் கேரன்டி என்றார்.