செங்குன்றம் பாடியநல்லூர் ஜோதி நகர் பகுதியைச் சேர்ந்தவர் முகமது ரஷீத். இவர் செங்குன்றத்தில் உள்ள ஒரு இறைச்சிக் கடையில் பணிபுரிந்து வருகிறார். முகமது ரஷீத், சுராகாதுன் என்பவரை திருமணம் செய்து, இரண்டு குழந்தைகளுடன் வசித்து வந்த நிலையில், சில மாதங்களுக்கு முன்பு தனது உறவுப்பெண்ணான சுரானா பேகம் என்பவரை இரண்டாவதாகத் திருமணம் செய்துகொண்டார். இதையடுத்து தனது இரண்டாவது மனைவியை தனது வீட்டின் அருகிலேயே வாடகை வீட்டில் குடியமர்த்தியிருந்தார். முகமது ரஷித் இரண்டாவது திருமணம் செய்துகொண்டது அவரது முதல் மனைவி சுராகாதுனுக்கு பிடிக்கவில்லை.
இதனால், ரஷித் வீட்டில் இல்லாத நேரம் சுரானா பேகத்திடம், சுராகாதுன் அடிக்கடி சண்டையிட்டு வந்துள்ளார். இந்நிலையில், முகமது ரஷித் இன்று அதிகாலை வேலைக்குச் சென்றவுடன் முதல் மனைவி சுராகாதுன், சுரானா பேகத்திடம் வாய்த்தகராறில் ஈடுபட்டுள்ளார். அப்போது மன உளைச்சலுக்கு ஆளான முதல் மனைவி சுராகாதுன், திடீரென்று சமையலறையில் உள்ள காய்கறி நறுக்கும் கத்தியை எடுத்து சுரானா பேகத்தை தாக்கியுள்ளார். இதில், கழுத்திலும், முகத்தின் தாடையிலும் வெட்டு விழுந்து கீழே மயங்கி விழுந்தார். சுரானா பேகம் அலறும் சத்தம் கேட்டு ஓடிவந்த அக்கம்பக்கத்தினர் ரத்த வெள்ளத்தில் இருந்த ரஷித்தின் இரண்டாவது மனைவியை காப்பாற்றி 108 ஆம்புலன்ஸ் மூலம் சென்னை அரசு ஸ்டான்லி மருத்துவமனைக்கு அனுப்பி வைத்தனர்
இந்த சம்பவத்தையடுத்து, முதல் மனைவி சுராகாதுன் செங்குன்றம் காவல் நிலையத்தில் சரண் அடைந்ததாக கூறப்படுகிறது. குடும்பத்தகராறு காரணமாக முதல் மனைவி இரண்டாவது மனைவியை கழுத்தை அறுத்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.
