திருச்சி மாவட்டம் சத்திரம் பேருந்து நிலையத்தில் உள்ள லலிதா ஜுவல்லரி நகைக்கடையில் அக்டோபர் இரண்டாம் தேதி 13 கோடி ரூபாய் மதிப்புள்ள நகைகளை கொள்ளையர்கள் திருடிச் சென்ற சம்பவம் பரபரப்பை ஏற்படுத்தியது. விசாரணையில், கடையின் ஊழியர் ராஜஸ்தானைச் சேர்ந்த பிரவீன்குமார் சிங் 5 கிலோ தங்கத்தை திருடிச்சென்று தப்பியோடியது தெரியவந்தது. தனிப்படை போலீசார் ராஜஸ்தானில் முகாமிட்டு பிரவீன் குமார் சிங்கை தேடி வருகின்றனர்.
இந்நிலையில், பிரவீன் குமார் சிங் திருடிய தங்க நகைகளில் 50 சவரனை, சவுகார்பேட்டையில் உள்ள நகைப்பட்டறையில் பணிபுரியும் அவரது நண்பர்கள் 4 பேரிடம் கொடுத்துவிட்டு சென்றது தெரியவந்துள்ளது. இதையடுத்து, தேனாம்பேட்டை காவல் துறையினர் சவுகார்பேட்டையில் உள்ள நகைப்பட்டறைக்கு சென்று 4 பேரிடமும் விசாரணை நடத்தினர்.
அதில், 50 சவரன் தங்க நகைகளை உருக்கி தங்க கட்டிகளாக மாற்றி வைத்திருப்பது தெரியவந்தது. நகையை பறிமுதல் செய்த காவல் துறையினர், 4 பேரிடமும் விசாரணை நடத்தி வருகின்றனர். மேலும், பிரவீன் குமார் சிங்கின் உறவினர்களின் பட்டியலை எடுத்து ஒவ்வொருத்தராக தனிப்படை காவல் துறையினர் விசாரணை மேற்கொள்கின்றனர்.
