சென்னை: தமிழ்நாடு மின்சாரம், மதுவிலக்கு மற்றும் ஆயத்தீர்வைத்துறை அமைச்சர் செந்தில் பாலாஜியின் கைது தொடர்பாகவும், நீட் தேர்வு முடிவுகள் தொடர்பாகவும், அதிமுக-பாஜக கூட்டணிக்குள் ஏற்படுள்ள பிரச்சினை தொடர்பாகவும், சென்னையில் உள்ள பாஜக தலைமை அலுவலகமான கமலாலயத்தில் தமிழக பாஜக தலைவர் அண்ணாமலை இன்று (ஜூன் 14) செய்தியாளர்களை சந்தித்தார்.
அப்போது பேசிய அண்ணாமலை, “தமிழகம் நேற்று பெருமை அடைந்துள்ளது. நீட் தேர்வு மூலமாக மாணவர் பிரபஞ்சன் பெருமையை தேடி தந்துள்ளார். அதேபோல் முதல் 10 ரேங்கில் 4 பேர் தமிழகத்தில் இருந்து வந்துள்ளனர். அவர்களை வாழ்த்துகிறேன். இந்த வருட நீட் தேர்ச்சி விகிதம் அதிகரித்துள்ளது. கடந்த ஆண்டை விட இந்த ஆண்டு தமிழகத்தில் தேர்ச்சி விகிதம் அதிகம். நீட்டை எதிர்க்கும் அரசியல் கட்சித் தலைவர்களுக்கு, இந்த தேர்வு முடிவு ஒரு பாடம். தமிழக மாணவச் செல்வங்கள், ஏழை மாணவர்கள், விவசாயிகளின் குழந்தைகள் அனைவரும் நீட்டை ஏற்றுக்கொண்டுள்ளனர்.
அமலாக்கதுறை ரெய்டு நடக்கிறது. கைது நடவடிக்கையும் எடுக்கப்பட்டு உள்ளது. கண்டனக் குரலும் பதிவு செய்யப்பட்டு வருகிறது. செந்தில் பாலாஜி போக்குவரத்து துறை அமைச்சராக இருந்த பொழுது பணத்தை வாங்கிக் கொண்டு வேலைக்கு சிபாரிசு செய்துள்ளார் என்பது குற்றச்சாட்டு. பணம் கொடுத்தும் வேலை கிடைக்காத அருள் மொழி புகார் அளித்துள்ளார். அதில் ஏ1 ஆக செந்தில் பாலாஜியை குறிப்பிட்டுள்ளார்.
திமுக பொறுப்பேற்ற பிறகு செந்தில் பாலாஜிக்கு 2 துறைகள் ஒதுக்கப்பட்டன. அவர்கள் பொறுப்புக்கு வந்ததும் இந்த வழக்குகள் எவ்வளவு வேகமாக நகர்ந்தது என்பதை நாம் பார்க்க வேண்டும். பணத்தை திரும்பக் கொடுத்ததாகக் கூறி வழக்குகளை திரும்பப் பெற்றனர். லஞ்சம் பெறப்பட்ட வழக்கில் காம்பரமைஸ் ஆனதை இந்திய வல்லுனர்களே ஆச்சர்யமாக பார்த்தனர்.
எந்த விதத்தில் அரசியல் காழ்புணர்ச்சியால் எடுக்கப்பட்ட நடவடிக்கை என்று முதலமைச்சர் மற்றும் அரசியல் கட்சியினர் கூறுகின்றனர் என தெரியவில்லை. தலைமைச் செயலகத்தில் அமைச்சர் அலுவலகத்தில் அதற்குரிய ஆதாரங்கள் இருக்கும் என்பதால்தான் சோதனை நடைபெற்றுள்ளது. முதலமைச்சர் சட்டத்தை மதிக்கிறார் என்றால், அமலாக்கத்துறைக்கு முழுமையாக ஒத்துழைப்பு தர வேண்டும்.
அமைச்சர் செந்தில் பாலாஜியின் வழக்கு அமலாக்கத்துறைக்கே வித்தியாசமான ஒரு வழக்கு. ஒரு குற்றாவாளியாக இருக்கும் செந்தில் பாலாஜியை முதலமைச்சர் நேரில் சென்று மருத்துவனையில் பார்த்துள்ளார், அமைச்சர்களும் பார்த்தள்ளனர். இது தமிழக மக்களையே தலைகுனிய வைக்கிறது.
போக்குவரத்தில் வேலை வாங்கித் தருவாதாக் கூறி கையூட்டு பெற்ற அடிப்படையில் அமலாக்கத்துறை நடவடிக்கை எடுத்துள்ளது. சட்ட ரீதியாக அமலாக்கத்துறை நடவடிக்கை எடுத்துள்ளது. இதில் அரசியல் காழ்புணர்ச்சி இல்லை. செந்தில்பாலாஜி நேற்று நடைப்பயிற்சி சென்றபோது பேட்டி கொடுக்கும் போது சோதனைக்கு முழு ஒத்துழைப்பு தருவேன் என்றார்.
கனிமொழி கைது செய்யப்பட்டபோது கூட இத்தனை பேர் போய் பார்த்தர்களா? என்று தெரியவில்லை. திமுகவின் கருவூலமே செந்தில் பாலாஜிதான் என்பதை இது உறுதிபடுத்துகிறது. ஏற்கனவே, செந்தில் பாலாஜியை அமைச்சரவையில் இருந்து விடுவிக்க வேண்டும் என்று முதலமைச்சருக்கு அறிவுறுத்தும்படி ஆளுநருக்கு மனு அளித்திருக்கிறோம். எனவே உடனடியாக அவரை பதவி நீக்கம் செய்து, அந்த துறையை வேறு அமைச்சர்களுக்கு கொடுக்க வேண்டும்.
நான் ஆங்கில பத்திரிகைக்கு அளித்த பேட்டியை முன்னாள் அமைச்சர்கள் தவறாக புரிந்துகொண்டுள்ளனர். நான் ஊழலுக்கு எதிராக எப்போதும் குரல் கொடுப்பேன். தமிழகத்தில் ஊழல் அதிகரித்துள்ளது, அதை சரிசெய்ய வேண்டும் என்றுதான் கூறினேன். ஊழல் பற்றி தொடர்ச்சியாக பேசி வருகிறேன். மறைந்த ஒருவரை பற்றி ஆராய்ச்சி செய்வது சிறப்பாக இருக்காது.
தமிழகத்தில் ஊழல் என்பதை பற்றிதான் நான் கூறி வருகிறேன். ஜெயலலிதாவைப் பற்றி தவறாக நான் எங்கேயும் பேசவில்லை. ஊழலுக்கு எதிரான போராட்டத்தை கையில் எடுத்துள்ளேன். அதற்கு நீங்கள் துணையாக நிற்க வேண்டும். பல இடங்களில் ஜெயலலிதா குறித்து பெருமையாக பேசியுள்ளேன். அதிமுக-பாஜக கூட்டணி தொடர்கிறது. அதிமுகவினரை போல் நான் தரம் தாழ்ந்து விமர்சனம் செய்ய மாட்டேன்.
தனியார் பள்ளியில் படித்து ஒருவர் நீட் தேர்ச்சி அடைந்துள்ளார் என்று கூறி அவரை சிறுமைப்படுத்த வேண்டாம். நீட் வருவதற்கு முன் எத்தனை அரசு மாணவர்கள் மருத்துவம் படித்தார்கள் என்று வெள்ளை அறிக்கை கேட்டுள்ளோம். 7.5% இட ஒதுக்கீட்டை இதில் கொண்டு வரவேண்டாம்" என்று கூறினார்.
