சென்னை: புதுடெல்லியில் 13வது தேசிய உறுப்பு கொடை தினத்தில் ஒன்றிய அரசின் சுகாதாரத் துறை அமைச்சர் மான்சுக் மாண்டவியாவிடம் இருந்து தேசிய உறுப்பு மற்றும் திசு மாற்று சிகிச்சை நிறுவனத்தால் உறுப்பு மாற்று சிகிச்சையில் சிறந்த செயல்பாட்டிற்கான இந்திய அளவில் சிறந்த மாநிலம் தமிழ்நாடு என்ற விருதினை மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் பெற்றுக்காெண்டார்.
அதனைத் தொடர்ந்து செய்தியாளர்களிடம் பேசிய அமைச்சர் மா.சுப்பிரமணியன், ''National Organ and Tissue Transplantation Organization (NOTTO) எனும் அமைப்பின் மூலம் 13வது இந்திய உறுப்பு தான தினம் இன்று அனுசரிக்கப்பட்டது. அந்த வகையில் இந்தியா முழுமைக்கும் உறுப்பு தான சிகிச்சைகள், மாற்று சிகிச்சைகள் அதே போல் அதற்கான விழிப்புணர்வு போன்ற பல்வேறு விஷயங்களில் சிறப்பாக செயல்படுகிற மாநிலங்கள் மற்றும் தனி மனிதர்கள், அமைப்புகள் என்று பல தரப்பட்டவர்களுக்கும் விருதுகள் வழங்கப்பட்டன.
இந்திய அளவில் உறுப்பு தானத் திட்டத்தில் சிறப்பான செயல்பாட்டிற்காக சிறந்த மாநிலமாக தமிழ்நாட்டை தேர்ந்தெடுத்து State Organ and Tissue Transplantation Organization (SOTTO) என்ற விருது வழங்கப்பட்டது. தமிழ்நாடு, ஏற்கனவே கடந்த காலங்களில் பெற்றிருந்த இந்த சிறப்புக்குரிய தகுதியைத் தொடர்ந்து நிலைநிறுத்தி வைத்துள்ளது.
இந்தியாவில் தமிழ்நாட்டில் தான் 2008ஆம் ஆண்டு செங்கல்பட்டு மாவட்டம், திருப்போரூர் பகுதியில் ஜித்தேந்திரன் என்ற மாணவன் ஒருவன் சாலை விபத்தில் மரணம் அடைந்த நேரத்தில் அவருடைய உறுப்புகளை பெற்றோர்கள் மனம் உகந்து உறுப்பு தானம் செய்தனர். அதனைத் தாெடர்ந்து 2008 செப்டம்பர் மாதம் மூளைச்சாவு அடைந்தவர்களிடத்திலிருந்து உறுப்புகளை பெற்று அதன் மூலம் மற்றவர்களுக்கு பொருத்துகிற அந்த மகத்தான திட்டத்தை அறிவித்து, தமிழ்நாடு அரசின் மூளைச் சாவு உறுப்பு மாற்று சிகிச்சை திட்டம் என்கின்ற ஒரு திட்டத்தை முன்னாள் முதலமைச்சர் கருணாநிதி தொடங்கினார். அந்த திட்டமானது தமிழ்நாடு உறுப்பு மாற்று ஆணையமாக உருவாக்கப்பட்டது.
தமிழ்நாட்டில் ஏற்கனவே, இந்த அரசு அமைவதற்கு முன் 13 அரசு மருத்துவமனைகளில் மட்டுமே ஆர்கன் ஆர்வஸ்ட் லைசன்ஸ் (Organ Harvest License) இருந்தது. தனியார் மருத்துவமனைகளை பொறுத்தவரை 120 மருத்துவமனைகளில் இந்த ஆர்கன் ஆர்வஸ்ட் லைசன்ஸ் பெற்றிருக்கின்றனர். கோயம்புத்தூரில் நடைபெற்ற கூட்டத்திற்குப் பிறகு, 27 அரசு மருத்துவக் கல்லூரி மருத்துவமனைகளுக்கும் 1 மாதத்தில் ஆர்கன் ஆர்வஸ்ட் லைசன்ஸ் பெற்றுத் தரப்பட்டது. தற்போது தமிழ்நாட்டில் 40 அரசு மருத்துவக் கல்லூரி மற்றும் மருத்துவமனைகளிலும், 120 தனியார் மருத்துவமனைகளிலும் இந்த Organ Harvest License உள்ளது.
இந்தியாவிலேயே உறுப்பு தானம் அதிகமாக பெறக்கூடிய மாநிலமாக தமிழ்நாடு திகழ்கிறது. இப்படி மிகச் சிறப்பான கட்டமைப்பினை பெற்றிருக்கிற காரணத்தினாலும், தொடர்ந்து இதய மாற்று அறுவை சிகிச்சை, கல்லீரல் மாற்று அறுவை சிகிச்சை, கணையம் மாற்று அறுவை சிகிச்சை, உறுப்பு மாற்று அறுவை சிகிச்சை, கருவிழி மாற்று அறுவை கிச்சை, தோல் மாற்று அறுவை சிகிச்சை, எலும்பு மாற்று அறுவை கிசிச்சை, எலும்பு மஜ்ஜை மாற்று அறுவை சிகிச்சை என்று பல வகைகளில் உறுப்பு மாற்று அறுவை கிச்சைகள் தமிழ்நாட்டில் மிகச் சிறப்பாக நடைபெற்றுக் கொண்டிருக்கிறது.
ஏழை எளியவர்களுக்கு முதலமைச்சர் காப்பீட்டுத் திட்டத்தின்கீழ் உடல் உறுப்பு தானங்கள் மக்களிடத்தில் விழிப்புணர்வு பெற்றிருக்கிறது. காப்பீட்டுத் திட்டத்தின் அடிப்படையில் 22 லட்சம் ரூபாய் அளவுக்குக் கூட உடல் உறுப்பு மாற்று அறுவை சிகிச்சைகளுக்கான அரசு சார்பில் காப்பீட்டுத் திட்டத்தின் மூலம் மக்கள் பயன்பெற்று கொண்டிருக்கின்றனர்.
2008க்குப் பிறகு, 1705 பேர் உடலுறுப்பு தானம் தந்துள்ளனர். 1705 பேர் தந்த உறுப்புக் கொடைகளின் மூலம் 6267 பேர் பயன் அடைந்துள்ளனர். இதில் இதயம் 786 பேருக்கும், நுரையீரல் 801 பேருக்கும், கல்லீரல் 1565 பேருக்கும், சிறுநீரகம் 3046 பேருக்கும், கணையம் 37 பேருக்கும், சிறுகுடல் 6 பேருக்கும், வயிறு 2 பேருக்கும், கைகள் 4 பேருக்கும், மொத்த திசுக்கள் 3946 என்று இதுவரை 6267 உறுப்புக் கொடைகள் இன்று வரை வழங்கப்பட்டு பயன் அடைந்துள்ளனர்.
இந்த ஆட்சி பொறுப்பேற்ற பிறகு 292 கொடையாளர்கள் உறுப்பு தானம் செய்ததால், 1162 பேர் பயன் அடைந்து இருக்கின்றனர். எனவே அந்த வகையில் உறுப்பு தானம் என்பது தமிழ்நாட்டில் ஒரு இயக்கமாக மிகச் சிறப்பாக பயன்பாட்டில் இருந்து வருகிறது. இந்தியாவிலேயே முதன் முறையாக நோயாளிகளின் உடல் உறுப்புகளை கண்காணிப்பதற்கு விடியல் என்கின்ற தானியங்கி இணையதளம் மற்றும் செயலி கடந்த 2021 ஆகஸ்ட் 13ஆம் தொடங்கி வைக்கப்பட்டது.
இந்தச் செயலியில் கடந்த ஒன்றரை வருடங்களாக வெளிப்படத்தன்மையிலும், மூப்பின் அடிப்படையிலும் நோயாளிகளுக்கு உறுப்பு ஒதுக்கீடுகளை அரசு வெளிப்படையாக செய்து வருகிறது. அதற்காக விடியல் என்கின்ற தானியங்கி இணையதளம் மிகச்சிறந்த வகையில் பயன்பாட்டில் இருக்கின்றது'' எனத் தெரிவித்தார்.
இந்நிகழ்வில் ஒன்றிய அரசு சுகாதாரத் துறை இணை அமைச்சர்கள் S.P.சிங்பகல், பாரதி பிரவின் பவார், மருத்துவம் மற்றும் மக்கள் நல்வாழ்வுத் துறை அரசு முதன்மைச் செயலாளர் ககன்தீப் சிங் பேடி தமிழ்நாடு மாநில உறுப்பு மாற்று ஆணைய உறுப்பினர் செயலாளர் மரு.கோபாலகிருஷ்ணன் மற்றும் உயர் அலுவலர்கள் உடனிருந்தனர்.
இதையும் படிங்க: உயர்கல்வி மாதிரி பாடத் திட்டம் குறித்து EPS-க்கு விளக்கம் அளிக்க நான் தயார் - அமைச்சர் பொன்முடி
