தமிழ்நாடு அரசின் 10ஆம் வகுப்பு சமூக அறிவியல் பாடப் புத்தகத்தில், "இந்து மகா சபா மற்றும் ஆர்எஸ்எஸ் அமைப்பு இஸ்லாமியர்களுக்கு எதிரான நிலைபாட்டை எடுத்தன" என்ற கருத்தை நீக்கக் கோரி, ஆர்எஸ்எஸ் நிர்வாகி தொடர்ந்த வழக்கில், நீதிமன்றம் எந்த உத்தரவும் பிறப்பிக்காத நிலையில், குறிப்பிட்ட கருத்து மறைக்கப்பட்டதாகவும், அடுத்த கல்வியாண்டில் அது குறித்த கருத்து நீக்கப்படும் எனவும் பள்ளிக்கல்வித்துறை தெரிவித்துள்ளது. இதைத்தொடர்ந்து, தனி நீதிபதி முன்னிலையில் இது குறித்த வழக்கு விசாரணையில் உள்ளது.
இந்நிலையில், ஆர்எஸ்எஸ் கருத்து பாடப் புத்தகத்திலிருந்து நீக்கப்படுவதற்கு எதிர்ப்பு தெரிவித்து, தந்தை பெரியார் திராவிடர் கழக துணைத்தலைவரும் மூத்த வழக்கறிஞருமான துரைசாமி சென்னை உயர் நீதிமன்றத்தில் வழக்குத் தொடர்ந்தார். அதில், 'உண்மை வரலாற்றை மறைக்கும் வகையில் பாடப் புத்தகத்தில் உள்ள கருத்தை நீக்க மாநில கல்வித்துறை, சட்டவிரோதமாக உத்தரவிட்டுள்ளது.
பாடப்புத்தகத்தை ஒருங்கிணைத்த குழுவிடம் முறையாக, அனுமதி பெறாமல் தன்னிச்சையாக ஆர்எஸ்எஸ் குறித்த கருத்தை நீக்க உத்தரவிடப்பட்டுள்ளது. 2006ஆம் ஆண்டு நீதிக்கட்சி குறித்து வெளியான பாடப்புத்தகப் பதிவில் "பிராமணர்களுக்கு" எதிரான கருத்தை நீக்கினால், வரலாறு மாற்றப்படும் என பாடப் புத்தகங்கள் ஒருங்கிணைப்பு தலைமைக்குழு மறுத்துவிட்டது.
மகாத்மா காந்தி, ஆர்எஸ்எஸ் தொண்டர் நாதுராம் விநாயக் கோட்சேவால் சுட்டுக் கொல்லப்பட்ட நிலையில், குஜராத் மாநில பாடப் புத்தகத்தில், காந்தி விபத்தில் மரணமடைந்ததாகக் குறிப்பிடப்பட்டு வரலாறு திரிக்கப்பட்டுள்ளது.
காந்தியின் மரணத்திற்குப் பிறகு ஆர்எஸ்எஸ் அமைப்பின், இஸ்லாமியர்களுக்கு எதிரானப்போர், இரண்டு நாடுகளுக்கு இடையே இன்றும் தொடர்கிறது. அதனால் பாடப்புத்தகத்தில் இருந்து குறிப்பிட்ட கருத்து நீக்கப்படும் என்ற கல்வித்துறையின் உத்தரவை ரத்து செய்ய வேண்டும்' எனக் குறிப்பிட்டுள்ளார்.
இந்த வழக்கு நீதிபதிகள் சத்யநாராயணன், ஹேமலதா அமர்வில் விசாரணைக்கு வந்தது. அப்போது அரசு தரப்பில், '10.01.2020 ஆர்எஸ்எஸ் பற்றிய கருத்தை நீக்கம் செய்ய கல்வித்துறை சுற்றறிக்கை’ அனுப்பியுள்ளதாகத் தெரிவிக்கப்பட்டது.
இதையடுத்து கேள்வி எழுப்பிய நீதிபதிகள், 'பாடப்புத்தகங்கள் எந்த வரலாற்று ஆதாரங்களின் அடிப்படையில் தயார் செய்யப்பட்டது. 50 ஆண்டிற்கு முன் நடந்தது என்பதற்காக வரலாற்றைத் திரித்து பதிவிட முடியுமா? சீன ஆக்கிரமிப்புகள் மற்றும் ஹிட்லர் போன்றோர்களின் செயல்பாடுகளும் வரலாறுதானே? அதை திரித்து பதிவிட முடியுமா? அப்படி இருக்கும் போது எந்த விதிகளின் கீழ், குறிப்பிட்ட பகுதி நீக்கப்பட்டது' என சரமாரியாக கேள்வி எழுப்பினர்.
மேலும், பள்ளிப் பாட புத்தகங்கள் ஒருங்கிணைப்புக்குழு மற்றும் பள்ளிக்கல்வித்துறை பதிலளிக்க உத்தரவிட்டு வழக்கை மார்ச் 19ஆம் தேதிக்கு ஒத்திவைத்தனர்.
இதையும் படிங்க...அனைத்து டயர்களும் தமிழ்நாட்டில்தான்: முதலமைச்சர் எடப்பாடி பழனிசாமி
