சென்னை: தமிழ்நாட்டைச் சேர்ந்த ராமேஸ்வரம் மீனவர்கள் 6 பேர், கடந்த ஆகஸ்ட் மாதம் 27 ஆம் தேதி இரவில் மீன்பிடித்துக் கொண்டிருந்தனா். அப்போது இலங்கை கடற்படையினர், ராமேஸ்வரம் மீனவா்களை எல்லை தாண்டி வந்து மீன்பிடித்ததாக கூறி கைது செய்தனா். மேலும் அவா்களின் படகுகளையும் இலங்கை கடற்படையினர் கைப்பற்றினர்.
தொடர்ந்து நீதிமன்றத்தில் ஆஜா்படுத்தப்பட்ட மீனவர்கள், இலங்கை சிறையில் அடைக்கப்பட்டனா். இதனையடுத்து தமிழ்நாடு முதலமைச்சர் ஸ்டாலின், கைது செய்யப்பட்ட தமிழ்நாட்டு மீனவர்களை உடனடியாக விடுவிக்க மத்திய அரசு நடவடிக்கை எடுக்க வேண்டும் என்று பிரதமர் மற்றும் மத்திய வெளியுறவுத்துறை அமைச்சர் ஆகியோருக்கு கடிதம் எழுதினார்.
தொடர்ந்து மத்திய அரசு இலங்கையில் உள்ள இந்திய தூதரக அலுவலர்களுக்கு இதுகுறித்து தகவல் தெரிவித்து, இலங்கை அரசுடன் பேச ஏற்பாடு செய்தனர். இந்நிலையில் இம்மாதம் 12 ஆம் தேதி இலங்கை நீதிமன்றம் தமிழ்நாட்டு மீனவர்கள் 6 பேரையும் விடுதலை செய்தது.
மேலும் விடுவிக்கப்பட்ட ராமேஸ்வரம் மீனவர்கள் 6 பேரும் இலங்கையில் உள்ள இந்திய தூதரகத்திடம் ஒப்படைக்கப்பட்டனர். இதனையடுத்து இந்திய தூதரக அலுவலர்கள் மீனவா்களை இந்தியாவிற்கு அனுப்ப ஏற்பாடு செய்தனா். ஆனால் 6 பேருக்கும் பாஸ்போர்ட், விசா ஆகியவை இல்லாததால் எமர்ஜென்சி சர்டிபிகேட் வழங்கப்பட்டது.
அதேநேரம் கரோனா வைரஸ் மருத்துவ பரிசோதனைகளும் நடத்தப்பட்டன. பின்பு 6 மீனவர்களையும் இந்திய தூதரக அலுவலர்கள் இன்று (செப் 27) கொழும்பிலிருந்து புறப்படும் ஏர் இந்தியா பயணிகள் விமானத்தில் சென்னைக்கு அனுப்பி வைத்தனர்.
சென்னை வந்த மீனவர்களை, மீன்வளத்துறை அலுவலர்கள் வரவேற்றனர். தொடர்ந்து அவர்களை அரசு சார்பில் ஏற்பாடு செய்யப்பட்ட வாகனத்தில் ஏற்றி சொந்த ஊருக்கு அழைத்துச் சென்றனர்.
இதையும் படிங்க: நடுக்கடலில் தத்தளித்த 19 மீனவர்கள் மீட்பு
