பொறியியல் படிப்பில் சேருவதற்கு இதுவரை 80 ஆயிரத்திற்கும் மேற்பட்ட மாணவர்கள் விண்ணப்பம் செய்துள்ளனர் எனவும், மாணவர்கள் செல்போன் மூலம் விண்ணப்பம் செய்வதற்கான வசதிகளும் இணையதளத்தில் செய்யப்பட்டுள்ளது என்றும் பொறியியல் மாணவர் சேர்க்கை செயலாளர் புருஷோத்தமன் தெரிவித்தார்.
இது குறித்து அவர் ஈடிவி பாரத் தமிழ்நாடு ஊடகத்திற்கு அளித்த சிறப்பு பேட்டியில், "2020-21 ஆம் ஆண்டு பொறியியல் படிப்பில் மாணவர்கள் சேர்வதற்கான ஆன்லைன் விண்ணப்பம் 15ஆம் தேதி முதல் தொடங்கப்பட்டது. இதுவரை சுமார் 80 ஆயிரம் மாணவர்கள் விண்ணப்பம் செய்துள்ளனர். மாணவர்கள் ஆகஸ்ட் 16 ஆம் தேதி வரை விண்ணப்பம் செய்யலாம். எனவே அவசரப்படாமல் www.tneaonline.org என்ற இணையதளத்தில் கொடுக்கப்பட்டுள்ள விபரங்களைக் படித்து விண்ணப்பங்களை சமர்ப்பிக்கலாம்.
மாணவர்கள் தங்களின் செல்போன் மூலம் விண்ணப்பம் செய்யும் வகையில் ஆன்லைன் விண்ணப்பத்தில் வசதியினை ஏற்படுத்தியுள்ளோம். கோவிட்-19இன் காரணமாக தங்கள் வீட்டிலிருந்தே விண்ணப்பத்தை சமர்ப்பிக்கலாம். மேலும் ஒவ்வொரு மாவட்டத்திலும் உருவாக்கப்பட்டுள்ள தமிழ்நாடு பொறியியல் மாணவர் சேர்க்கை சேவை மையங்களுக்கு சென்று அங்கேயே அவர்களின் விண்ணப்பத்தினை பூர்த்தி செய்து விண்ணப்பிக்கலாம்.
பொறியியல் மாணவர் சேர்க்கை குறித்து அதன் செயலாளர் தகவல் மாணவர்கள் கட்டணம் செலுத்துவதில் கடந்த ஆண்டு சில பிரச்சினைகள் இருந்தன. அவற்றை இந்தாண்டு சரி செய்து உள்ளோம். மாணவர்கள் தாங்கள் கட்டணம் செலுத்தியது எந்த நிலையில் உள்ளது என்பதையும் அறிந்து கொள்ளும் வசதியும் ஏற்படுத்தப்பட்டுள்ளது.
மாணவர்கள் இணையதளத்தில் எவ்வாறு பதிவு செய்ய வேண்டும் என்ற விபரம் குறித்தும் தமிழ் மற்றும் ஆங்கிலத்தில் வீடியோவும் பதிவேற்றம் செய்துள்ளோம்.
அவர்களுக்கு தேவையான வழிமுறைகள் தமிழ் மற்றும் ஆங்கிலத்தில் பதிவேற்றம் செய்யப்பட்டுள்ளது. தமிழ்நாடு பொறியியல் மாணவர்கள் சேர்க்கை சேவை மையத்திற்கு கோவிட்-19 காலத்தில் பாதுகாப்பாக செல்வதற்கு முன்கூட்டியே அனுமதி பெறும் வசதியும் ஏற்படுத்தப்பட்டுள்ளது.
அனைத்து வகையான பாதுகாப்பு முறைகளும் செய்யப்பட்டுள்ளன. மாணவர்கள் தங்களின் சான்றிதழ்களை ஜூலை 31ஆம் தேதி முதல் பதிவேற்றம் செய்யலாம் என அறிவித்து உள்ளோம்.
அதற்கு தேவையான வழிமுறைகளை விரைவில் வெளியிட உள்ளோம். கடந்தாண்டு அரசு சேவை மையங்களின் மூலம் பதிவேற்றம் செய்ய வசதி செய்யப்பட்டது.
இந்தாண்டு கோவிட்-19 பாதுகாப்பு நடைமுறை காரணமாக மாணவர்கள் தங்களின் சான்றிதழ்களை பாதுகாப்பாக பதிவு செய்வதற்கான வழிமுறைகள் குறித்து திட்டம் வகுத்து வருகிறோம்.
அதனைப் பின்பற்றி மாணவர்கள் பதிவேற்றம் செய்யலாம். மாணவர்கள் சந்தேகங்களை நிவர்த்தி செய்து கொள்ள தொலைபேசி எண்களும் அறிவிக்கப்பட்டுள்ளது" எனத் தெரிவித்தார்.
இதையும் படிங்க: மறுகூட்டல், மறு மதிப்பீடு அறிவிப்பில் காலதாமதம் - கலக்கத்தில் மாணவர்கள்
