சென்னை திருமங்கலத்தில் உள்ள தனியார் நிறுவனத்தில் ஆனந்தகுமார் என்பவர் மேலாளராக பணியாற்றி வருகிறார். இவர், அலுவலக வாசலில் நிறுத்தி வைக்கப்பட்டிருந்த தனது கார் மாயமானதாக, திருமங்கலம் காவல் நிலையத்தில் கடந்த மாதம் 19ஆம் தேதி புகார் அளித்தார்.
இதுகுறித்து வழக்குப் பதிவு செய்த காவல் ஆய்வாளர் வேல்முருகன் தலைமையிலான தனிப்படையினர், காரை தேடி வந்தனர்.
இந்நிலையில், திருமங்கலம் பகுதியில் இன்று அதிகாலை தனிப்படையினர் வாகன சோதனையில் ஈடுபட்டபோது, அந்த வழியாக வந்த கார் ஒன்றை நிற்க சொல்லியும், அது நிற்காமல் சென்றது. பின்னர், அந்த காரை துரத்திச் சென்று பிடித்த காவல் துறையினர், அதில் இருந்த மூன்று நபர்களிடம் விசாரணை மேற்கொண்டனர்.
அப்போது, அவர்கள் புதுக்கோட்டை மாவட்டத்தைச் சேர்ந்த கிறில்ராஜ்(22), பாலாஜி(21), மணிகண்டன்(22) என்பதும் அந்த கார் புகார் அளித்த ஆனந்தகுமாருடையது என்பதும் தெரியவந்தது.
மேலும் இந்த கும்பல் பாண்டிபஜார், செம்மஞ்சேரி, காஞ்சிபுரம் ஆகிய பகுதிகளில் மொத்தம் ஆறு இருசக்கர வாகனங்களையும் திருடியிருப்பது விசாரணையில் கண்டறியப்பட்டது.
இதையடுத்து, ஆறு இருசக்கர வாகனம் மற்றும் காரை பறிமுதல் செய்த திருமங்கலம் காவல் துறையினர், அந்த கும்பலை கைது செய்து விசாரணை மேற்கொண்டு வருகின்றனர்.
