இதுகுறித்து தன்னாட்சி இயக்கம், மக்களின் குரல், அறப்போர் இயக்கம், தோழன் இயக்கம் மற்றும் இன்ஸ்டியூட் ஆஃப் கிராஸ்ரூட்ஸ் கவர்னன்ஸ் ஆகிய அமைப்புகள் கூட்டாக சேர்ந்து அரசுக்கு கோரிக்கை வைத்துள்ளன.
இதுகுறித்து இந்த 5 இயக்கங்களும் சேர்ந்து வெளியிட்ட பத்திரிகை செய்திக்குறிப்பில், 'தமிழ்நாட்டின் சட்டப்பேரவைக் கூட்டத்தொடர் இன்று தொடங்கி நடைபெறுகிறது. இதில் மாநிலத்தின் நிதி நிலை அறிக்கை தாக்கல் செய்யப்படும் என எதிர்பார்க்கப்படுகிறது.
இந்த பெருந்தொற்றுக் காலத்தில் கூட தங்களுக்கு நிதி விடுவிக்கப்படவில்லை எனப் பல ஊராட்சித் தலைவர்கள் குறிப்பிடுகிறார்களே தவிர, இந்த மாதம் இவ்வளவு நிதி எங்களுக்கு மாநில நிதிக்குழு நிதியிலிருந்து வரவேண்டும் என்றோ, திட்ட நிதிகள் இவ்வளவு வரவேண்டும் என்றோ, கிராம ஊராட்சித் தலைவர்களால் குறிப்பாகச் சொல்ல முடியாத நிலையையே பரவலாகப் பார்க்க முடிகிறது.
இதற்குக் காரணம் , ஒரு நிதியாண்டில் மத்திய, மாநில அரசுகளின் நிதிப் பகிர்வின் மூலம் என்னென்ன நிதிகள், எவ்வளவு வரும் என்ற தகவல் அவர்களுக்குத் தெரிவதில்லை.
கிராம ஊராட்சி வளர்ச்சித் திட்டம்:
நிதிப் பகிர்வு குறித்த தெளிவின்மையால், திட்டப்பணிகள் மீதான பிடிப்பில்லாமல், பல கிராம ஊராட்சித் தலைவர்கள், பெரும்பாலான சமயங்களில் மாநில,மாவட்ட மற்றும் வட்டார அளவிலான அலுவலர்கள் சொல்வதையெல்லாம் மறுபேச்சில்லாமல் ஏற்றுக்கொண்டு, இயங்க வேண்டிய சூழலுக்குத் தள்ளப்படுகின்றனர்.
வெளிப்படைத்தன்மை அவசியம்:
கடந்த 2017ஆம் ஆண்டில் உட்கட்டமைப்புக்கான நிதி ஒதுக்கீடு என்ற பெயரில் மாநில அளவிலேயே உள்ளாட்சிகளுக்கு வரவேண்டிய நிதியில் 20 விழுக்காடு நிதியை அரசு எடுத்துக்கொண்டது.
உள்ளாட்சிகளுக்கான நிதிப் பகிர்வு குறித்த வெளிப்படையான பட்டியல் இருக்கும் பட்சத்தில், ஊராட்சிப் பிரதிநிதிகளுக்கு மட்டுமல்லாமல், கிராம சபையின் உறுப்பினர்களான பொதுமக்களுக்கும் திட்டமிடுவதற்கும் முடிவுகள் எடுப்பதற்கும் அவை பயனுள்ளதாக இருக்கும்.
கேரளா வழிகாட்டுகிறது:
கேரள அரசு, அதன் மூன்றடுக்கு கிராம ஊராட்சிகள் மற்றும் நகர்ப்புற உள்ளாட்சிகள், ஆகியவற்றுக்கு ஒதுக்கப்படும் நிதிகளைத் தனித்தனியே பட்டியலிடுகிறது.
சமூக நீதிக்கான கோரிக்கை: அரசியல் சாசனம், ஊராட்சிகளுக்கான சமூக நீதியையும் பொருளாதார முன்னேற்றத்தையும் குறிப்பிடுகிறது. எனவே, தெளிவான நிதிப் பகிர்வு குறித்த தகவல் என்பது, சமூக நீதிக்கான பணி என்ற புரிதல் அரசுக்குத் தேவை.
நம்பிக்கையோடு காத்திருக்கிறோம்:
இந்த நிதியாண்டு முதல் தமிழ்நாட்டிலுள்ள ஒவ்வொரு கிராம ஊராட்சி, ஒன்றிய ஊராட்சி, மாவட்ட ஊராட்சிக்கான நிதிப்பகிர்வு மற்றும் ஒவ்வொரு பேரூராட்சி, நகராட்சி மற்றும் மாநகராட்சிக்கான நிதிப்பகிர்வு ஆண்டுக்கு எந்தெந்த வகையில் எவ்வளவு ஒதுக்கப்பட்டுள்ளது என்ற விவரம் நிதிநிலை அறிக்கையில், பிற்சேர்க்கையாக இணைத்துத்தாக்கல் செய்யப்பட வேண்டும் என்று கோருகிறோம்' என்று குறிப்பிடப்பட்டுள்ளது.
இதையும் படிங்க: '15 நாள்களில் ஸ்மார்ட் கார்டு' - ஆளுநர் அறிவிப்பு
