இந்தியாவின் 73ஆவது சுதந்திர தினம் வரும் ஆகஸ்ட் 15ஆம் தேதி கொண்டாடப்படவிருப்பதை முன்னிட்டு நாட்டின் முக்கிய நகரங்களில் பாதுகாப்பு பலப்படுத்தப்பட்டுள்ளது. அந்த வகையில் சென்னையின் முக்கிய ரயில் நிலையங்களில் மோப்ப நாய்களை பயன்படுத்தி தீவிர சோதனை மேற்கொள்ளப்பட்டுவருகிறது.
அந்தவகையில், சென்னை எழும்பூர் ரயில் நிலையத்தில் நடைபெற்ற சோதனைக்குப்பின் செய்தியாளர்களைச் சந்தித்த எழும்பூர் ரயில்வே பாதுகாப்புப் படை ஆய்வாளர் மோகன் பேசுகையில், ”ரயில் நிலையங்களில் பாதுகாப்பு நடவடிக்கைகளை பலப்படுத்தக் வேண்டும் என்ற உத்தரவின்பேரில் சென்னை எழும்பூர் உட்பட முக்கிய ரயில் நிலையங்களில் மூன்று அடுக்கு பாதுகாப்பு போடப்பட்டுள்ளது.
மேலும், ரயில்வே துணை கண்காணிப்பாளர் ஹரிஷ் தலைமையில் ரயில்வே பாதுகாப்புப் படையினர் பயணிகளின் உடமைகள், ரயில்பாதை, பார்சல் பிரிவு உள்ளிட்ட பல்வேறு இடங்களை மோப்ப நாய் உதவியுடன் தொடர் சோதனை மேற்கொண்டுவருகின்றனர். ரயில் நிலையத்தில் உள்ள 80 கண்காணிப்பு கேமராக்களின் உதவியுடன் ஒவ்வொரு பயணியின் நடவடிக்கைகளும் கண்காணிக்கப்பட்டுவருகிறது. எந்தவொரு அசம்பாவிதமும் நடைபெறாத வகையில் சுதந்திர தினத்தைக் கொண்டாட தேவையான பாதுகாப்பு மேற்கொள்ளப்பட்டுவருகிறது. சுமார் 50 பேர் எழும்பூர் ரயில் நிலையத்தில் பாதுகாப்புப் பணிகளி ஈடுபட்டுள்ளனர். ரயில் நேரத்திற்கு வரும் பயணிகள் அரை மணி நேரம் முன்னதாக வந்தால் அவர்களது உடமைகளை சோதனை செய்து அனுப்ப ஏதுவாக இருக்கும்” என்றார்.
